Мунньахха Ил Түмэн дьокутааттара, ситэриилээх былаас уорганнарын салайааччылара, улуустар, нэһилиэктэр баһылыктара, улуустар дьокутааттарын Сэбиэттэрин бэрэссэдээтэллэрэ, уопсастыбанньыктар кыттыыны ыллылар. Уопсайа видео-кэмпириэнсийэҕэ 90-тан тахса киһи холбонно. “Төгүрүк остуол” үлэтин “Ил Түмэн” издательскай дьиэ генеральнай дириэктэрэ, “Ил Түмэн” хаһыат кылаабынай эрэдээктэрэ Мария Христофорова салайан ыытта.
Манна даҕатан эттэххэ, сүрүн кэпсэтии саҥа механизмнарга сыһыаннаах ситэ өйдөммөт түгэннэр тула барда. “Төгүрүк остуол” кыттыылаахтарын боппуруостарыгар Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин, тыа хаһаайыстыбатын миниистирин солбуйааччы Василий Афанасьев сиһилии хоруйдаатылар.
Андрей Находкин “тыа хаһаайыстыбатын сорох боломуочуйаларын улуустарга биэрии” туһунан сокуон барыла 2020 сыл ахсынньы 1 күнүгэр Ил Түмэн XXII пленарнай мунньаҕар бүтэһиктээх ааҕыыга киирэрин санатта. Өскөтүн сокуон барыла бигэргэннэҕинэ, эһиилгиттэн быһаччы улуустары кытта үлэ саҕаланарын эттэ. Билигин улуустарга саҥа өйөбүллэргэ сыһыаннаах элбэх боппуруос мунньулунна диэтэ. Олорго барытыгар сиһилии хоруйдуу, быһаара сатыыбыт диэн бэлиэтээтэ.
Бүгүҥҥү “төгүрүк остуол” сүрүн уратытынан – кыттыылаахтар тута боппуруостарга уонна этиилэргэ киирбиттэрэ буолар. Ол курдук, Ньурба улууһун дьокутааттарын Сэбиэтин бэрэссэдээтэлэ Сергей Евсеев соҕотуопканан дьарыктанар тэрилтэлэр үлэҕэ сыһыаннарын тосту уларытыахтарын наада диэн эттэ. Кини эһиил субсидия ылбыт кэтэх ыаллартан үүттэрин киилэтин 10 солк. эрэ тутарынан муҥурдаммакка, онтон элбэх суумаҕа тутар кыаҕы үөскэтэллэригэр санаатын үллэһиннэ. “Оччоҕо элбэх киһи үүт туттарыа этэ” диэтэ.
Амма улууһун дьокутааттарын Сэбиэтин бэрэссэдээтэлэ Софья Александрова, Уус Алдан улууһун дьокутааттарын Сэбиэтин бэрэссэдээтэлэ Иван Колодезников, Нам улууһун баһылыга Юрий Слепцов, Уус Алдан улууһун баһылыгын I солбуйааччы Петр Попов кэтэх ыаллар сирдэрин боппуруоһугар тохтоотулар. Санатан эттэххэ, бу боппуруос улуустарга олус сытыытык турар. Ол курдук, кэтэх хаһаайыстыба биир ыанар ынаҕар 35 тыһ. солк. субсидия ыларыгар биир кэлим реестрга киирбит буолуохтаах. Ол гынан баран, ити реестрга киирэр хаһаайыстыба 2,5 га эрэ сирдээх буолара ирдэнэр. Өскөтүн сирин иэнэ улахан буоллаҕына, кыайан киирбэт уонна субсидия ылбат. “Ити сокуонунан Уус Алдан улууһун кэтэх ыалларын 10 % эрэ субсидияҕа тиксэр кыахтаах”, – диэн Петр Попов бэлиэтээтэ. Онон дьон ити боппуруоска улаханнык айманар диэтэ. Инньэ гынан норуот дьокутааттарын өрөспүүбүлүкэтээҕи сокуоҥҥа суһаллык сөптөөх уларытыылары киллэрэллэригэр ыҥырда.
Маны таһынан норуот дьокутааттара Любовь Явловская, Петр Аммосов, Антонина Григорьева, Ньурба улууһун Маалыкай нэһилиэгин баһылыга Иосиф Иванов, Үөһээ Бүлүү улууһун Балаҕаннаах нэһилиэгин баһылыга Степан Дмитриев, Мэйик нэһилиэгин баһылыга Михаил Хаччагаев, о.д.а. бэйэлэрин санааларын эттилэр. Үгүс тыл этээччи саҥа механизмнар кэтэх өрүттэригэр сыһыаннаах боппуруостарга тохтоото. Манна барытыгар Андрей Находкин уонна Василий Афанасьев сиһилии хоруйдары биэрдилэр.
“Төгүрүк остуол” туһунан “Ил Түмэн” хаһыат 47 №-гэр сиһилии ааҕаарыҥ. Элбэх боппуруоска чопчу хоруйдары булуоххут.
-
0
-
0
-
0
-
0
-
0
-
0
