Бэлиитикэ

Сокуон барыла оҥоһуллар кэмигэр уопсайа 578 көннөрүү, ол онтон 46 көннөрүү норуот дьокутааттарыттан киирбит. Сокуон барылын ис хоһоонун Ил Түмэн бүддьүөккэ, үпкэ, нолуокка уонна бас билии боппуруостарыгар сис кэмитиэт бэрэссэдээтэлэ Юрий Николаев билиһиннэрдэ.

Эһиил бүддьүөт дохуоттаах чааһа 225,6 млрд солк. тэҥнэһэр, бу иннинээҕи бүддьүөт туһунан сокуоҥҥа барыллаан ааҕыллыбыт көрдөрүүгэр эбии 26 млрд солк. эбиллибит.

Нолуоктан киирэр дохуот 6,6 млрд солк улаатыннарыллан, 123,5 млрд солк. буолар. Бу улаатааһын тэрилтэлэр барыыстарыттан киирэр нолуогу улаатыннарааһын түмүгэр буолбут. Ол курдук барыыстан киирэр нолуогунан эбии 4,7 млрд солк. киирэрэ сабаҕаланар, ол түмүгэр бүддьүөккэ бу хайысханан киирэр үп 40 млрд солк. тэҥнэһиэҕэ. Сир баайын хостуур хампаанньалартан эбии 2,4 млрд солк. киирэрин быһаарбыттар.

2021 сылга бүддьүөт ороскуоттаах чааһа 226,6 млрд солк., бүддьүөт дэписсиитэ 999 мөл. солк. буолар

Барыллааһын быһыытынан 2022 сылга өрөспүүбүлүкэ бүддьүөтүн дохуоттаах чааһа 9 млрд солк. улаатан, 228 млрд солк. тэҥнэһиэҕэ. 2023 сылга бу көрдөрүү 241 млрд солк. буолара сабаҕаланар, эбии 58 млрд солк-нан улаатыннарыллан. 2022 сылга өрөспүүбүлүкэ бүддьүөтүн ороскуоттаах чааһа 229,3, 2023 сылга 242,8 млрд солк. буолара сабаҕаланар.

Норуот дьокутааттара киллэрбит көннөрүүлэринэн куоластааһын буолла. Елена Голомарева «СӨ Бэтэринээрийэ департаменыгар бас бэринэр судаарыстыба бүддьүөтүн тэрилтэлэрин уларытан тэрийэр туһунан» сокуон киирбитинэн хотугу улуустарга сулууспалары сарбыйыы түмүгэр тахсар үлэни хонтуруоллуур хамыыһыйа тэрийэр туһунан, Алена Атласова элбэх оҕолоох дьиэ кэргэҥҥэ туһаайыллыбыт миэрэлэргэ, чуолаан бэриллибит сир инфраструктуратын оҥорууга уонна биэс уонна онтон элбэх оҕолоох ыаллар олорор дьиэлэрин тупсарыыга көрүллэр үбү улаатыннарар туһунан, Павел Петров оскуола иннинээҕи тэрилтэлэр кэккэ категория үлэһиттэрин хамнаһын улаатыннарар туһунан көннөрүүлэрин салгыы көрөр буоллулар.

Сокуон барылынан норуот дьокутааттара санааларын эттилэр.

Гаврил Парахин, ЛДПР фракциятын салайааччыта

-- Биһиги фракциябыт өрөспүүбүлүкэ бүддьүөтүн оҥорууга көхтөөхтүк кыттар. Сэттэ сылы быһа киллэрэр этиилэрбит улахаҥҥа ууруллубатылар. Мин оччолорго соҕотох этим, билигин биһиги түөрпүт. Онон сотору биһиги куоласпытын истэр инигит диэн эрэнэбит. Биллэн турар, бу суолталаах докумуон олоххо киирэригэр мэһэйдэспэппит. Салгыы үлэлэһэргэ бэлэммит.

Валерий Лютый, “Биир ньыгыл Арассыыйа”:

-- Дьиэ кэргэн уонна оҕо уйгутун боппуруоһа дойду Төрүт сокуонугар биир сүрүн соругунан буолар. Элбэх оҕолоох дьиэ кэргэҥҥэ бэриллэр учаастак уотун, ититиитин, суолун оҥоһуутугар биһиги 200 мөл. солк. көрүҥ диэн этии киллэрбиппит. 139 мөл. солк. көрүлүннэ. Ааспыт сылга эмиэ бачча көрүллүбүтэ. Оттон уопсайа 3 млрд солк. тахса наада. Аны туран, ол 139 мөл. солк. кэмигэр тутуллубатах. Тоҕо? Ол биричиинэтин билиэхпитин наада. Ол кэннэ үбүлээһин кээмэйин кычаппакка, улаатыннарар наада.

Андрей Находкин, “Биир ньыгыл Арассыыйа”:

-- Тыа хаһаайыстыбатын салаатыгар 2021 сылтан сайдыыга туһаайыллыбыт саҥа кэм саҕаланар. Тыа хаһаайыстыбатынан дьарыктанар дьону өйүүр миэрэлэргэ 4 млрд солк. көрдүлэр. Былырыын бу суума 2,8 млрд солк. этэ. Тыа хаһаайыстыбатын сайдыытын бырагырааматыгар 10 млрд 360 мөл. солк. көрүлүннэ. Иккис бырагыраамаҕа 1 млрд 911 мөл. солк. көрүлүннэ. Ол курдук уопсайа 12 млрд солк. тыа хаһаайыстыбатын салаатын сайыннарыыга ыытылынна.

Виктор Губарев, РФКП фракциятын Саха сиринээҕи салаатын салайааччыта:

-- Биһиги фракция сокуон барылын өйөөбөппүт. Баартыйа чилиэннэрэ бүддьүөт барылын оҥорууга көхтөөхтүк үлэлээбиттэрэ. Ол эрээри, биһиги киллэрэр этиилэрбит толоруллубатылар. Аччыгый авиацияҕа, хотугу улуустарга таһаҕас таһыыга көрүллэр үп кыра. Дьадайыыны кытары охсуһууга үлэ мөлтөх.