Ил Түмэн наукаҕа, үөрэххэ, култуураҕа, сонуну киэҥник тарҕатар ситимнэргэ уонна уопсастыбаннай тэрилтэлэр дьыалаларыгар сис кэмитиэтин бэрэссэдээтэлэ Феодосия Габышева бу бырайыагы олоххо киллэрэргэ үлэлиир. «Үөрэнээччилэр доруобуйалара биһигини долгутар. Мэдэссиинэ кабинеттарын ооскуолаларга педагогтар, быраастар уонна доруобуйа харыстабылын салайааччыларын көмөтүнэн киллэриэхпитин сөп. Билигин араас дьаҥ тарҕана турдаҕына бу боппуруоһу суолтаҕа ыларбыт ирдэнэр. Биһиги РФ Федерация Сэбиэтин сокуоннары оҥорооччулар сэбиэттэригэр оскуолаҕа мэдэссиинэни төнүннэрии боппуруоһун ойо тутан туспа көрөллөрүгэр көҕүлээбиппит. Ол курдук «Оскуолаҕа мэдэссиинэ» бырайыагы РФ Федерация Сэбиэтин сокуоннары оҥорооччулар сэбиэттэрин былааныгар киллэрэллэрин ситиспиппит”, -- диэн Феодосия Габышева иһитиннэрдэ.
2019 сыллаахха оччотооҕуга Амма балыыһатын кылаабынай бырааһа, Амма улууһун дьокутааттарын сэбиэтин бэрэссэдээтэлэ Софья Александрова Федерация Сэбиэтин бэрэссэдээтэлэ Валентина Матвиенко кыттыылаах мунньахха «Оскуолаҕа мэдэссиинэ» бырайыагы олоххо киллэрэр миэрэлэри федеральнай таһымҥа ылар наадалааҕын туһунан иһитиннэрии оҥорбут. Ол эрээри, бу боппуруос билиҥҥитэ быһаарылла илик.
«РФ биэс субъегар үлэлээбит бырайыак түмүгэр олоҕуран бырайыак олоххо киирэригэр эрэнэбит», -- диэн Федосия Габышева этэр.
Былырыын Амма улууһугар Ил Түмэн үс сис кэмитиэтэ кыттыылаах мунньах буолбут, Дьокуускай куоратын думатыгар бу боппуруоһу эмиэ дьүүллэспиттэр. “Амма улууһугар ыытыллыбыт мунньах түмүгүнэн 2021 сылтан оҕо саадтарыгар социальнай пакеттаах, хамнастаах 18 үлэ миэстэтин арыйдыбыт. Урут оҕо саадтара, оскуолалар балыыһалары кытары дуогабардаһан оҕо доруобуйатын көрөр-истэр үлэлэрин ыыталлара. Сотору кэминэн Феодосия Габышевалыын Ямал-Ненецкэй уокуругар пилотнай бырайыагы хайдах олоххо киллэрбиттэрин билсэ барыахпыт, кинилэр уопуттарын Саха сиригэр киллэрэр баҕалаахпыт”, -- диэн Софья Александрова эппит.
«Биир ньыгыл Арассыыйа» баартыйа өрөспүүбүлүкэтээҕи салаатын пресс-сулууспата.
-
0
-
0
-
0
-
0
-
0
-
0
