Пресс-кэмпириэнсийэҕэ бүтүн өрөспүүбүлүкэ хаһыаттарын, интэриэт таһаарыыларын бэрэстэбиитэллэрэ кыттыыны ылаллар. Аһаҕас көрсүһүүгэ “Кыым”, “Ил Түмэн”, “Саха сирэ”, “Якутия”, “Эхо столицы”, “Якутск вечерний”, “Хотугу Кыым”, “Амма олоҕо”, “Ленский вестник”, “Мүрү саһарҕата”, “Үөһээ Бүлүү”, “Сунтаар сонуннара”, “Эҥсиэли” хаһыаттар уонна “Интерфакс-Дальний Восток”, “ЯкутияМедиа” ИА, “Тасс в Якутии”, “Саха” теле-араадьыйа хампаанньа, СИА, “УлусМедиа”, “Сахапресс”, “Якутия24”, “В Якутии.ру” тэлэбиидэнньэ уонна интэриниэт таһаарыыларын суруналыыстара ыҥырылыннылар.
Ил Түмэн 2020 сыллааҕы үлэтин сүрүн сыыппаралара
(отчуоттан быһа тардыы)
Ааспыт 2020 сылга Ил Түмэн Судаарыстыбаннай Мунньаҕа 11 пленарнай мунньаҕы, 1 парламент Сэбиэтин мунньаҕын ыытан, 279 нормативнай правовой аактаны, ол иһигэр 95 сокуону уонна 184 уурааҕы ылыммыт.
Саамай элбэх нормативнай правовой аакта социальнай бэлиитикэ, бас билии уонна экэнэмиичэскэй сайдыы боппуруостарын, тыа хаһаайыстыбатын, сир баайын туһаныы уонна сир сыһыаннаһыыларын, билиим, култуура, үөрэхтээһин, доруобуйа харыстабылын хайысхаларынан оҥоһуллан бигэргэммит.
Ордук суолталаах сокуоннарынан буолбуттар:
– 3-тэн 7 диэри саастаах оҕолорго ыйдааҕы төлөбүрү олохтуур туһунан сокуон;
– Элбэх оҕолоох ыаллар өрөспүүбүлүкэтээҕи Дьиэ кэргэн хапытаалларын суотугар 15 тыһ. солк. биир кэмнээх төлөбүрү ылалларын туһунан сокуон;
– Саха Өрөспүүбүлүкэтин 2032 сылга уонна 2050 сылга диэри тус көрүүлээх социальнай-экэнэмиичэскэй сайдыытын Стратегиятыгар уларытыылары, көннөрүүлэри киллэрии;
– Саха Өрөспүүбүүлүкэтин “Нолуок туһунан сокуонугар” уларытыылары киллэрии; Элбэх оҕолоох ыаллары тырааныспар нолуогуттан босхолооһун; газомоторнай уматык ырыынагын сайдыытын нолуокка чэпчэтиилэри оҥорон көҕүлээһин; 2021 сыл тохсунньу 1 күнүттэн биир кэлим ааҕыллар нолуоктан (ЕНВД) нолуок атын систиэмэлэригэр “ыарыыта” суох көһүүнү хааччыйыы; Аартыка урбаанньыттарыгар чэпчэтиилэри олохтооһун; эрэгийиэннээҕи инвестиционнай бырайыактары олоххо киллэрэр тэрилтэлэр нолуоктарын үрдэтии;
– Саха Өрөспүүбүлүкэтин нэһилиэнньэлээх пууннарыгар таһаҕас таһыытын уһулуччу эрэсиимин олохтуур туһунан сокуон;
– Саха Өрөспүүбүлүкэтин 2021 сыллааҕы уонна 2022-2023 сыллардааҕы барыллаан бүддьүөттэрин бигэргэтии;
– Улуустарга уонна куорат уокуруктарыгар кылаас салайааччыларыгар эбии төлөбүрү оҥороллоругар судаарыстыбаннай боломуочуйаны биэрии туһунан сокуон. 2020 сыл балаҕан ыйын 1 күнүттэн кылаас салайааччыларыгар ый аайы 5 тыһ. солк. эбии төлөбүр оҥоһуллар буолбута;
– Улуустарга уонна куорат уокуруктарыгар тыа хаһаайыстыбатын өйөбүлүн судаарыстыбаннай боломуочуйатын биэрии. Быйылгыттан ынах-сүөһү көрүүтүгэр уонна үүтү тутуу субсидиятын мэхэньииһимэ уларыйда.
Ил Түмэн 57 федеральнай сокуон барылын көрдө, ону таһынан РФ субъектарын сокуону оҥорор уорганнарын 1 сокуону оҥорор көҕүлээһиннэрэ уонна 21 ыҥырыылара көрүллэн бигэргэннилэр.
2020 сыл түмүгүнэн 9 парламентскай истии, 34 бырабыыталыстыба чааһа уонна 19 “төгүрүк остуол” тэрилиннилэр.
Хамсык кэмигэр Ил Түмэн мунньаҕын 80 % дистанционнай көрүҥүнэн барда.
2020 сыл балаҕан ыйын 28 күнүгэр уонна ахсынньы 22 күнүгэр хотугу аҕыйах ахсааннаах төрүт норуоттар бэрэстэбиитэллэрин-дьокутааттарын 2 сугулаана (ассамблеята) буолан ааста.
2020 сыл муус устар 6 күнүгэр уонна ахсынньы 29 күнүгэр Ил Түмэн Судаарыстыбаннай Мунньаҕын иһинэн үлэлиир муниципальнай тэриллиилэр быыбарданар уорганнарын Сэбиэтин икки мунньаҕа буолан ааста.
2019 сылтан Ил Түмэн Судаарыстыбаннай Мунньаҕын иһинэн Ыччат парламена тэриллибитэ. 2020 сылга Ыччат парламена 2 пленарнай мунньаҕы уонна 2 президиум мунньаҕын ыытта.
2020 сыл тохсунньу 24 күнүгэр Ил Түмэн Судаарыстыбаннай Мунньаҕын Бэрэссэдээтэлин иһинэн Уопсастыбаннай сүбэлэһэр сэбиэт 1 мунньаҕа тэрилиннэ. Мунньахха РФ Албан аат уонна үйэтитии, Саха Өрөспүүбүлүкэтигэр Патриотизм сылыгар аналлаах тэрээһиннэр тула кэпсэтии барбыта.
2020 сылга үлэ саҥа көрүҥэ киирбитэ. Ол курдук, экэниэмикэ салааларын анал декадалара ыытыллар буолбуттара. Былырыын олунньу 5-14 күннэригэр Тыа хаһаайыстыбатын декадата ыытыллыбыта.
Ил Түмэн Судаарыстыбаннай Мунньаҕа Госдума, Федерация Сэбиэтин, Арассыыйа сокуону оҥорооччуларын, “Уһук Илин уонна Забайкалье” парламеннар ассоциацияларын бары тэрээһиннэригэр көхтөөхтүк кыттар. Ол курдук, Ил Түмэн Судаарыстыбаннай Мунньаҕа “Уһук Илин уонна Забайкалье” парламеннар ассоциацияларын 3 уопсай мунньаҕын чэрчитинэн сокуону оҥорууга араас таһымнаах этиилэри киллэрбитэ. 2020 сыл от ыйын 17 күнүгэр “Аартыка сирин баайын харыстааһын уонна туһаҕа таһаарыы кыһалҕалара” диэн “төгүрүк остуол” буолан ааспыта. 2020 сыл алтынньы 6 күнүгэр Ил Түмэҥҥэ Госдума сир баайыгар, чааһынай бас билиигэ уонна сир сыһыаннаһыыларын сис кэмитиэтин үлэ хаамыытынан мунньаҕа буолбута.
Ааспыт сылга Ил Түмэн Судаарыстыбаннай Мунньаҕа II Хотугу форум кыттыгас тэрийээччитин быһыытынан үлэлээбитэ.
Ил Түмэн Судаарыстыбаннай Мунньаҕын 2020 сыллааҕы үлэтин туһунан сиһилии https://iltumen.ru/ официальнай саайтан билсиэххитин сөп.
-
0
-
0
-
0
-
0
-
0
-
0
