Пресс-кэмпириэнсийэҕэ нэһилиэк баһылыктара туруорбут сытыы кыһалҕалара эмиэ ахтылыннылар. Санатан эттэххэ, икки нэдиэлэ анараа өттүгэр өрөспүүбүлүкэ нэһилиэктэрин баһылыктара бэйэлэрин икки ардыларыгар туспа онлайн-мунньах тэрийэн, нэһилиэктэр бүддьүөттэрин ааҕыллыытын саҥа методикатын, муниципальнай стаж, биэнсийэҕэ тахсыы уо.д.а. кыһалҕалар тула мунньахтаабыттара.
– Тохсунньу 29 күнүгэр Ил Түмэн Судаарыстыбаннай Мунньаҕын бэйэни салайыныы боппуруостарын сис кэмитиэтигэр улуус уонна нэһилиэк баһылыктарын кытта “төгүрүк остуол” буолаары турар. Ити боппуруостар бүтүннүү мунньах бэбиэскэтигэр киирбиттэрэ. Бу көрсүһүү кэмигэр биир сүбэҕэ кэлэр этиилэри хомуйуохпут. Ити этиилэри бастаан сис кэмитиэт көрүө. Онтон Ил Түмэн Судаарыстыбаннай Мунньаҕын таһымыгар таһаарыахпыт.
Ил Түмэн Судаарыстыбаннай Мунньаҕа олохтоох бэйэни салайыныы уорганнарын этиилэрин учуоттаабакка эрэ сокуоннары ылына олорор дииллэрэ – төрүкү сыыһа өйдөбүл. Ааспыкка нэһилиэк баһылыктара олохтоох бүддьүөттэри ааҕыы саҥа методикатын туһунан мунньахтаабыттар этэ. Итиннэ мин биири чопчулуохпун баҕарабын.
Ил Түмэн Саха Өрөспүүбүлүкэтин Үбүн министиэристибэтин саҥа методиканы оҥорууга үлэлиир бөлөҕүн отчуотун истибитэ. Ити бөлөххө бары улуустар бэрэстэбиитэллэрэ киирбиттэрэ. Күһүн бу боппуруоһу хаттаан “төгүрүк остуолга” көрбүппүт. Бу көрсүһүүгэ улуустар уонна нэһилиэктэр бэрэстэбиитэллэрэ ыҥырыллыбыттара. Онно олохтоох бэйэни салайыныы уорганнара боппуруоһу ситэ дьүүллэспэтэхтэрэ биллибитэ. Онон этиилэри хомуйуу саҥа болдьоҕун анаабыппыт. Хомойуох иһин, улуустартан биир да этии киирбэтэҕэ.
Күн бүгүн хас биирдии улууска уонна нэһилиэккэ быһалыы тахсар саҥа систиэмэни оҥоро сылдьабыт. Нэһилиэк баһылыктара иһитиннэриилэри тиэрдии, өйдөтүү үлэтэ ситэтэ суоҕун ыйаллар. Ол эрээри, ити боппуруоһунан аҥаардас парламент эрэ буолбакка, олохтоох бэйэни салайыныы уорганнара эмиэ күүскэ дьарыктаныахтаахтар, – диэн Петр Васильевич бэйэтин санаатын иһитиннэрдэ.
-
0
-
0
-
0
-
0
-
0
-
0
