Парламент спикера Ил Түмэн Судаарыстыбаннай Мунньаҕын уонна тус бэйэтин аатыттан Арассыыйа билимин күнүнэн биир дойдулаахтарын эҕэрдэлээтэ уонна Дүпсүн сиригэр саха норуотун 27 биллэр учуонайа төрөөбүтэ диэн бэлиэтээтэ. “Бу үтүө үгэс салгыы салҕанарыгар баҕарабын. Дүпсүн нэһилиэгиттэн өссө да элбэх билим чаҕылхай бэрэстэбиитэллэрэ тахса, үүнэ-сайда турдуннар”, – диэн баҕа санаатын тиэртэ.
Петр Гоголев нэһилиэк дьаһалтатыгар, Дүпсүн орто оскуолатын кэлэктиибигэр уонна “Дуонду” сынньалаҥ киинин испэсэлиистэригэр Захар Васильевич Гоголев 110 сылыгар аналлаах тэрээһини тэрийбиттэригэр улаханнык махтанна.
Саха сирин парламенын спикера Дүпсүн нэһилиэгэ дириҥ устуоруйалаах, силистээх нэһилиэк буоларын тоһоҕолоото уонна эдэр ыччакка төрөөбүт түөлбэлэрин устуоруйатын сыныйан үөрэтэллэригэр сүбэлээтэ. Петр Гоголев Захар Васильевич уонна Дүпсүн нэһилиэгиттэн төрүттээх биллэр диэйэтэллэр тустарынан матырыйааллары интэриниэккэ киллэрэллэригэр көрдөстө. Кини билигин аан дойду бүтүннүүтэ куйаар ситиминэн туһанарын эттэ. Онон биир дойдулаахтарыгар инновационнай аныгы технологиялары күүскэ баһылыылларыгар баҕарда.
Үөрүүлээх мунньах кэмигэр Ил Түмэн бэрэссэдээтэлэ А.Е. Кулаковскай саха интеллигенциятыгар суругуттан быһа тардыыны булан аахта. Онно Дүпсүнтэн төрүттээх, оччотооҕу кэм биир саамай сайдыылаах уонна үөрэхтээх дьоно Афанасьевтар ахтыллаллар диэтэ. Маны таһынан Петр Васильевич сахаттан бастакы үрдүк үөрэхтээх юрист, 1897 сыллаахха М.В. Ломоносов аатынан Москватааҕы судаарыстыбаннай университеты бүтэрбит юридическай билим дуоктара Михаил Алексеевич Афанасьев буолар диэн бэлиэтээтэ. Онон спикер нэһилиэк дьаһалтатыгар биллэр биир дойдулаахтарын ааттарын үйэтитэргэ тустаах үлэлэри ыыталларыгар көрдөстө уонна кэккэ сорудахтары биэрдэ.
“Кэлэр көлүөнэ төрөөбүт түөлбэтин устуоруйатын билиэхтээх. Удьуорун, төрдүн-ууһун билэр киһи хаһан баҕарар духуобунай күүстээх буолар”, – диэн Петр Васильевич эттэ.
Үөрүүлээх тэрээһиннэргэ Петр Васильевиһы кытта Дүпсүн нэһилиэгин баһылыга Николай Сивцев, социологическай билим хандьыдаата, СӨ үөрэҕириитин үтүөлээх үлэһитэ, СӨ судаарыстыбаннай сулууспатын туйгуна Анастасия Божедонова, Уус Алдан улууһун бочуоттаах олохтооҕо, СӨ норуотун хаһаайыстыбатын үтүөлээх үлэһитэ, “Ытык Сүбэ” чилиэнэ Иннокентий Бочкарев, Уус Алдан улууһун үөрэҕин салалтатын начальнига Ирина Тарская, Дүпсү орто оскуолатын дириэктэрэ Валерий Рожин, устуоруйа билимин хандьыдаата, Арассыыйа билимин академиятын Сибиирдээҕи салаатын үтүөлээх бэтэрээнэ Пантелеймон Петров, устуоруйа билимин хандьыдаата Василий Ушницкай уо.д.а. кытттыыны ыллылар.
Ил Түмэн пресс-сулууспатын матырыйаалынан.
-
0
-
0
-
0
-
0
-
0
-
0
