“Төгүрүк остуол” кэмигэр “Якутия” авиа-хампаанньа генеральнай дириэктэрэ Владимир Горбунов Дьокуускайтан Москваҕа уонна Санкт-Петербурга сөмөлүөтүнэн көтөргө сааһынан хааччаҕа суох чэпчэтиилээх билиэттэр атыыланыахтарын сөп диэн иһитиннэрдэ.
Санатан эттэххэ, олунньу ый саҥатыгар РФ Бырабыыталыстыбата Уһук Илин олохтоохторугар сөмөлүөккэ чэпчэтиилээх билиэт бырагырааматын кэҥэппитэ. Онон чэпчэтиллибит сыаналаах билиэти 23 саастарыгар диэри устудьуоннар уонна 60-тан үөһэ саастаах биэнсийэлээхтэр эрэ буолбакка, Уһун Илин олохтоохторо бары атыылаһар кыахтаммыттара.
Ол гынан баран, хомойуох иһин, бу бырагыраамаҕа Саха сирин 3 эрэ хайысхата хабыллыбыта. Ол курдук, Мииринэйтэн Москваҕа, Полярнайтан Москваҕа уонна Нерюнгриттан Москваҕа сырыылар киирбиттэрэ. Дьокуускай ойоҕоско туран хаалбыта.
– “Якутия” авиа-хампаанньа 23-гэр диэри саастаах эдэр дьоҥҥо уонна 60-тан үөһэ саастаах биэнсийэлээхтэргэ чэпчэтиилээх билиэттэри бары бигэргэтиллибит хайысхаларынан атыылыы олорор. Онно федеральнай бүддьүөттэн 650 мөл. солк. кэриҥэ көрүллүбүтэ. Ону таһынан өрөспүүбүлүкэҕэ Мииринэйтэн Москваҕа, Полярнайтан Москваҕа уонна Нерюнгриттан Москваҕа сырыыларга 160-170 мөл. солк. кэлбитэ. Маныаха “Алроса” авиа-хампаанньа Мииринэйтэн Москваҕа, Полярнайтан Москваҕа көтөр. Оттон “Якутия” хампаанньа Нерюнгриттан Москваҕа сырыыта субсидияҕа хапсыбыта. Онно 81 мөл. солк. көрүллүбүтэ.
Бэҕэһээ Нерюнгри аэропордун өрөмүөҥҥэ сабар туһунан дьаһал таҕыста. Ол курдук, 4 ый устата (от ыйыттан алтынньыга диэри) салгынынан сырыы тохтуоҕа. Онон Нерюнгри хайысхатыгар бэриллибит субсидия харчытын Дьокуускайга көһөрүөхпүтүн баҕарабыт. Ону РФ тырааныспарын министиэристибэтигэр биллэрдибит. Мин санаабар, үбү уонна хайысханы көһөрүүнү өйүөхтэрэ.
Билиҥҥитэ Нерюнгрига от ыйыгар диэри 15-20 мөл. суумалаах чэпчэтиилээх билиэт атыыланна. Ордубут 60-тан тахса мөлүйүөнү Дьокуускайга көһөрдөхпүтүнэ, дьон сааһынан хааччаҕа суох Москваҕа уонна Санкт-Петербурга көтөр кыахтаныаҕа. Маннык эрэ дьаһаннахпытына номнуо көрүллүбүт үбү бүтүннүү туһаҕа таһаарыахпытын сөп. Маныаха федеральнай таһымҥа биһигини өйүөхтэрэ дии саныыбын, – диэн мунньах кэмигэр Владимир Павлович иһитиннэрдэ.
Эрдэ иһитиннэриилэри киэҥник тарҕатар сириэстибэлэргэ Дьокуускай эбии үбүлээһиҥҥэ хапсыан сөп диэн суруйа сылдьыбыттара. Онуоха Госдума дьокутаата Федот Тумусов саарбахтыырын биллэрдэ. Кини бу боппуруоһунан РФ тырааныспарын министиэристибэтин кытта хайыы үйэ үлэлэспиттэрин эттэ. Онно билиҥҥитэ “үп-харчы суох” диэбиттэр. Онон “боппуруос күн бүгүнүгэр диэри аһаҕас”, – диэн Федот Семенович бэлиэтээтэ.
Оччотугар Дьокуускай олохтоохторо Нерюнгри субсидиятын киин куоракка көһөрөллөрүгэр эрэ эрэниэхтэрин наада. Быйыл онтон атын субсидия көрүллүбэтэ буолуо.
-
0
-
0
-
0
-
0
-
0
-
0
