Санаттахха, Госдумаҕа 2017 сыл ахсынньы 20 күнүгэр үөһэ этиллэр федеральнай сокуон үһүс ааҕыыга ылыллыбыта.
Бу иннинэ «Булт туһунан уонна булт ресурсаларын харыстааһын, Россия Федерациятын сорох сокуонун аакталарыгар уларытыылары киллэрии туһунан» сокуон барыла, Госдума регламеныгар олоҕуран, туһааннаах түмүктээһиннэри ылыыга анаан РФ субъектарыгар ыытыллыахтааҕа. Ол эрээри сокуон барыла өрөспүүбүлүкэҕэ ыытыллыбатаҕа. Онон Саха сирин парламенын тустаах кэмитиэтэ сокуон барылыгар бэйэтин санаатын этэр кыаҕа суоҕа.
Мунньахха норуот дьокутааттара, айылҕа министиэристибэтин, булка, ыты иитиигэ сыһыаннаах тэрилтэлэр бэрэстэбиитэллэрэ уо.д.а. кыттыбыттара.
Ити Госдума бастаан ылыммыт сокуонун Федерация Сэбиэтэ төннөрөн турар. Онон 2018 сыл тохсунньутугар Госдума туһааннаах кэмитиэтэ сөбүлэһиннэрэр хамыыһыйа тэрийбитэ. Өрөспүүбүлүкэ парламенын кэмитиэтин иннигэр бэйэтин көрүүтүн иһитиннэрэн, сөбүлэһиннэрэр хамыыһыйа, Госдума уонна Федерация Сэбиэтин туһааннаах кэмитиэттэрин аадырыстарыгар быһаарыыны ыытар сорук турбута.
Мунньахха баар айылҕа харыстабылын миниистирин солбуйааччыта Николай Додохов Саха сиригэр эһэ ахсаана 15 тыһ. тиийэрин, кинилэр сыллата дьиэ сүөһүтүгэр саба түһэллэрин уонна дьоҥҥо кутталлаахтарын туһунан эппитэ.
Кини, чуолаан, ыттар эһэ баарын биллэрэн, хаһаайыттарын көмүскүүллэрин, булчут ыттары анал хахха нөҥүө эһэни кытта хапсыһарга үөрэтии көдьүүһэ суоҕун, дьиҥнээх булка эбэтэр кыылы кытта көрсүһүүгэ ол мөлтөх дьайыылаах буолуоҕун эппитэ. Онон өрөспүүбүлүкэ булчуттара ити сокуону утаралларын биллэрбитэ.
Итиннэ кыттыбыт дьон бэйэлэрин тус санааларын үллэстибиттэрэ. Якутохотрыболовсоюз бэрэссэдээтэлэ Закира Иванова булчут ыттары үөрэтиини бобуу булчуттар дохуоттарыгар уонна ыты иитии сайдыытыгар охсуулаах буолуоҕун ыйбыта. Кини ити сокуон барылын оҥорууга боломуочуйалар РФ субъектарыгар бэриллэллэригэр этии киллэрбитэ. Эксперт-кинолог Роберт Константинов Хоту сиргэ дьон булдунан аһаан олорорун бэлиэтээн туран, үөрүйэҕэ суох ыт эһэни үрэн баран, хаһаайыныгар сүүрэрин, ол түмүгэр эһэ киһиэхэ саба түһэрин быһаарбыта. Онон кини булчут ыты сыччах 2-тэ, 3-тэ эрчийдэххэ, номнуо үөрүйэхтэнэрин, кыылы кытта эрэллээхтик күөн көрсөрүн, ол хаачыстыбаларын удьуордарыгар биэрэрин эппитэ.
Быыһыыр сулууспа начальнига Николай Находкин иһитиннэрбитинэн, сири-уоту бырамыысыланнас баһылаабытын түмүгэр сиэмэх кыыллар киһиттэн куттаммат буолбуттар. Оннооҕор дьон олорор сирдэрин чугаһыгар киирэллэрэ үгүс.
Саха сирин ыты иитээччилэрин ассоциациятын бэрэссэдээтэлэ Станислав Городилов РФ субъектарыгар сокуон барылын оҥорууга боломуочуйалары биэрэр туһунан Закира Иванова этиитин өйөөбүтэ, онуоха эбэн кини булчут ыттар реестрдэрин оҥорор наадатын бэлиэтээбитэ.
Мунньах түмүгүнэн сөбүлэһиннэрэр хамыыһыйа, Госдума уонна Федерация Сэбиэтин туһааннаах кэмитиэттэрин аадырыстарыгар официальнай этиилэри бэлэмнээһиҥҥэ үлэлиир бөлөҕү тэрийэргэ быһаарбыттара.
Федеральнай Мунньахха тэриллибит сөбүлэһиннэрэр хамыыһыйа үлэтин түмүгүнэн, Госдума 2018 сыл олунньутугар сокуону бүтэһиктээхтик ылыммыта. Ол быһыытынан, бултуур сирдэргэ эрэ уонна кыылларга кырыктаах сыһыаны таһаарбакка, эмсэҕэлэппэккэ эрэ ыттары бултуу үөрэтиллэр. Оттон кыыл көҥүл сылдьыбат түгэнигэр хахха оҥорон эрэ баран, ыттары кытта көрсүһүннэрэллэр. Маныаха булчуттар ытынан бултуур бырааптаахтара бэлиэтэммитэ.
Сокуон кыыллары кырыктаах сыһыантан көмүскүүр майгылааҕа көстүбүтэ. Өрөспүүбүлүкэҕэ сокуону кэһээччилэр да суох буолбатахтара. Ол курдук, 2019 сыл муус устар 5 күнүгэр эһэни кытыннаран, булчут боруода ыттар күрэхтэһиилэрин ыытар былаан баарын туһунан Айылҕа министиэристибэтигэр үгүс дьон биллэрбитэ.
Тэрийээччилэр – Болугур нэһилиэгин дьаһалтатын уонна «Кыымаан» булчуттар кулууптарын аадырыстарыгар ити күрэхтэһиини тэрийэр сатамматын туһунан сэрэтии ыытыллыбыта. Ол түмүгэр былааннаммыт тэрээһиннэр тохтотуллубуттара.
Бу мөккүөрдээх боппуруоһу билигин РФ министиэристибэтэ бэлэмниир бирикээһэ чопчулуур аналлаах.
-
0
-
0
-
0
-
0
-
0
-
0
