Ол курдук, бастакынан, Судаарыстыбаннай Мунньах (Ил Түмэн) бэрэссэдээтэлэ Петр Гоголев Инстаграмм страницатыгар @gogolev388 суруйарынан, Дьокуускай куорат Октябрьскай, Сайсаар уокуруктарыгар олорор Аҕа дойду сэриитин кыттыылаахтарыгар уонна аҕам саастаах дьоҥҥо мааска туттардылар. “Ытыктабыллаах доҕоттор, бэйэҕитин харыстаныҥ! Баһаалыста дьиэҕитигэр олоруҥ! Эһиги оҕолоргутугар, сиэннэргитигэр, доҕотторгутугар, дьүөгэлэргитигэр уонна чугас дьоҥҥутугар наадаҕыт! Бу мааскалар эһиги дьиэттэн тахсар түгэҥҥитигэр көмө буолуохтара. Ыарыыны кыайбыппыт кэннэ хайаан да көрсүөхпүт”, — диэн Петр Гоголев суруйар. Бу курдук акцияларга көхтөөхтүк норуот дьокутааттара Алиш Мамедов, Руслан Федотов, Алексей Еремеев, Елена Голомарева, Андрей Находкин, Валерий Лютый, Виктор Лебедев, Оксана Михайлова, Нюргуяна Захарова, уо.д.а кытталлар.
Маны таһынан норуот дьокутаата Владимир Чичигинаров социальнай сулууспалар уонна медицинскэй тэрилтэлэр үлэлэрин хонтуруоллуур.
Ил Түмэн пресс-сулууспата иһитиннэрбитинэн, Судаарыстыбаннай Мунньахха (Ил Түмэҥҥэ) “Биир ньыгыл Арассыыйа” баартыйа фракциятыттан норуот дьокутааттара “Биир ньыгыл Арассыыйа” баартыйа регионнааҕы салаатын иһинэн Волонтер киинин кытта коронавируһу утары үлэлиир эмчиттэргэ, ону таһынан ыарахан балаһыанньаҕа олорор ыалларга аадырыстаах көмө оҥорор түбүктээхтэр. Санатар буоллахха, “Биир ньыгыл Арассыыйа” баартыйа регионнааҕы салаатын иһинэн Волонтер киинэ кулун тутар 25 күнүттэн үлэлиир. Судаарыстыбаннай Мунньахха баартыйа фракциятын чилиэннэрэ тус бэйэлэрин харчыларынан инфекционнай балыыһа уонна икки обсерватор үлэһиттэригэр бородуукта атыылаһан түҥэттилэр. Маны таһынан, норуот дьокутааттара ыарыһахтар сытар палааталарыгар анаан 5 кондиционер, 10 түннүк жалюзитын, медицинскэй үлэһиттэргэ велотренажер, дьыбаан ылан бэлэхтээтилэр. “Биһиги Кыайыыбыт” акциянан норуот дьокутааттара кыттыылаах Волонтер киинэ барыта 82 Аҕа дойду сэриитин кыттыылаахтарыгар уонна тыыл бэтэрээннэригэр бородуукта тарҕаттылар.
Инфекционнай стационар эмчиттэрин көрдөһүүлэринэн, норуот дьокутааттара үлэһиттэр уонна кинилэр оҕолоро сайыҥҥы кэмҥэ сынньана баралларыгар чэпчэтиилээх путевканан хааччыйары хонтуруолга ыллылар. Медицинскэй үлэһиттэр М.К. Аммосов аатынан ХИФУ психолог-учуонайдара психологическай көмө оҥороллоругар баҕа санаалаахтарын биллэрдилэр. Судаарыстыбаннай Мунньах (Ил Түмэн) бэрэссэдээтэлин солбуйааччы Антонина Григорьева бэлиэтииринэн, фракция чилиэннэрэ тохтоло суох үлэлиир тэрилтэлэр үлэһиттэрин оҕолорун көрөргө оҕо саадын иһинэн дьуһуурустуба бөлөҕүн тэрийэн үлэни хонтуруоллууллар.
Дьахтар-парламентарийдар кулууптарын бэрэссэдээтэлэ Феодосия Габышева бүгүн, муус устар 17 күнүгэр ыарахан балаһыанньаҕа түбэспит дьахталларга онлайн-консультация (84112) 43-52-11 төл. ыытар.
Волонтердар Дьокуускай куораттааҕы кырдьаҕастар пансионаттарын олохтоохторугар кинигэ уонна сурунаал биэрдилэр. Судаарыстыбаннай Мунньахха (Ил Түмэн) “Биир ньыгыл Арассыыйа” баартыйа фракциятын чилиэнэ, норуот дьокутаата Мария Христофорова уус-уран литератураны бэлэх уунна.
«Забота» аҕам саастаах дьон уонна инбэлииттэр пансионаттарын директора Людмила Кокорева кэпсииринэн: “Пансионакка 28 киһи олорор. Кинигэлэри уонна сурунааллары олохтоохтор олус сөбүлээтилэр, тута үллэһиннилэр. Бары үөрдүлэр уонна астыннылар”. “Биир ньыгыл Арассыыйа” баартыйа регионнааҕы салаатын иһинэн Волонтер киинин пресс-сулууспата иһитиннэрбитинэн, коронавирус ыарыытын тарҕаппат бары дьаһаллары тутуһан, кинигэлэр уонна сурунааллар туттарылыннылар. Ону таһынан, Набережнай уокурук быыбардааччы бэтээрээннэригэр анаан пасханан бэлэх тарҕаттылар.
-
0
-
0
-
0
-
0
-
0
-
0
