Бэлиитикэ

“Төгүрүк остуолу” Ил Түмэн наукаҕа, үөрэххэ, култуураҕа, иһитиннэриилэри киэҥник тарҕатар сириэстибэлэргэ сис кэмитиэтэ (бэр. Ф.В. Габышева), дьиэ кэргэҥҥэ уонна оҕо аймах дьыалаларыгар сис кэмитиэтэ (бэр. А.Н. Атласова) уонна ыччакка, физическай култуураҕа уонна успуорка сис кэмитиэтэ (бэр. М.Д. Гуляев) кыттыһан ыыттылар.

Тэрээһин видео-кэмпириэнсийэ көрүҥүнэн барда. Көрсүһүүгэ норуот дьокутааттара, бырабыыталыстыба чилиэттэрэ, үөрэх тэрилтэлэрин салайааччылара, исписэлиистэрэ, министиэристибэлэр бэрэстэбиитэллэрэ, Счетнай палаата, СӨ хонтуруоллуур-кэтиир уорганнарын үлэһиттэрэ кытыннылар.

Мунньах кэмигэр Ил Түмэн дьиэ кэргэҥҥэ уонна оҕо аймах дьыалаларыгар сис кэмитиэтин бэрэссэдээтэлэ Алена Атласова былырыын хамсыгынан сиэттэрэн сайыҥҥы сынньалаҥынан өрөспүүбүлүкэ оҕотун баара-суоҕа 35 %-на эрэ хабыллыбытын эттэ. Онон “төгүрүк остуол” кыттыылаахтара быйылгы балаһыанньаны дьүүллэстилэр.

Сүрүн иһитиннэриилэри үөрэх миниистирин солбуйааччы Владимир Тихонов, ыччат миниистирэ Степан Саргыдаев, Дьокуускай үөрэҕин салалтатын начальнига Алексей Семенов, РФ ЫБМ министиэристибэтин Саха сиринээҕи салаатын профилактикаҕа үлэтин салайааччы Сергей Овчинников, Роспотребнадзор салайааччытын солбуйааччы Наталья Борисова, Өймөкөөн улууһун дьокутааттарын Сэбиэтин бэрэссэдээтэлэ Татьяна Алферова оҥордулар.  

Маны таһынан, көрсүһүү кыттыылаахтарын ыйытыыларыгар СӨ Бырабыыталыстыбатын Бэрэссэдээтэлин солбуйааччы Сергей Местников хоруйдаата.

Быйыл оҕо сынньалаҥын эбийиэктэрин өрөмүөнүгэр 50 мөл. солк. көрүллүбүт. Ону куонкурс түмүгүнэн тэрилтэлэринэн үллэрэр былааннаахтар. Билиҥҥитэ 16 муниципальнай тэриллииттэн 21 стационарнай лааҕырга сайаапка кэлбит. Быйыл сайын уопсайа 594 лааҕырга 37466 оҕо сынньанара былааннанар. Маныаха өрөспүүбүлүкэ бүддьүөтүттэн 394 мөл. 907 тыһ. солк. көрүллүбүт. Онтон 273 мөл. 766 тыһ. солк. Саха Өрөспүүбүлүкэтигэр 2020-2024 сылларга үөрэҕи сайыннарыы өрөспүүбүлүкэтээҕи бырагыраама “Оҕо сайыҥҥы сынньалаҥа уонна чэбдигириитэ” диэн алын бырагырааманан көрүллүбүт.

Бу сайын Дьокуускайга 58 оҕо сынньалаҥын тэрилтэтэ үлэлиирэ былааннаммыт. Манна 6826 оҕо сылдьара сабаҕаланар. Лааҕырдарынан хабыллыбат оҕолорго эбии үөрэхтээһин кииннэригэр социальнай бырайыактар үлэлиэхтээхтэр. Ол курдук, “Оҕо киинигэр” 12000 оҕо сылдьара былааннанар.

СанПин ирдэбилинэн, быйылгы сезоҥҥа лааҕырдар 75 % эрэ туолан үлэлииллэрэ этиллэр. Маныаха балааккалаах лааҕырдар үлэлэрин эрэгийиэннээҕи суһал штаб быһаарар. Саҥа быраабыланан, оҕолор лааҕырга биир күн иһигэр кэлэн күргүөмүнэн киирэллэрэ, итиэннэ кэлэктиип смена устата биир сиргэ олорон үлэлиирэ ирдэнэр. Өскөтүн үлэһиттэр тастан сылдьан үлэлиир буоллахтарына, кэмиттэн кэмигэр COVID-19 анаалыһын туттарыахтаахтара этиллэр.

“Төгүрүк остуол” кэмигэр тыл этээччилэр норуот дьокутааттарын ыйытыыларыгар хоруйдаатылар.

Феодосия Габышева: “Аартыка улуустарын оҕолоро быйылгы сайыҥҥы сынньалаҥнарын айанын төлөбүрэ толору төлөнүө дуо?” – диэн ыйытта. Үөрэх миниистирин солбуйааччы Владимир Тихонов иһитиннэриитинэн, быйылгыттан айан төлөбүрэ толору төлөнөр буолбут. Санаттахха, урукку өттүгэр оҕолор Дьокуускайтан сынньанар сирдэригэр диэри айаннара эрэ толуйуллара. Билигин айан төлөбүрэ толору оҥоһуллар буолбут.

Вице-спикер Антонина Григорьева хас да кыһалҕаны таарыйда. Ол курдук, өрөспүүбүлүкэҕэ оҕо сайыҥҥы сынньалаҥын саҥа стандартара, инклюзивнай үөрэх бырагыраамалара олохтонуохтаахтар уонна лааҕыр үлэһиттэрин COVID-19 анаалыска төлөбүрдэрэ субсидияланыахтаах диэн этиилэри киллэрдэ. Саҥа быраабыланан, үлэһиттэр смена аайы тустаах анаалыһы туттаран эрэ баран үлэлииллэрэ көҥүллэнэр.

Наталья Румянцева оҕо сайынын дьарыктаах буолуутун уопсастыбаннай хонтуруола хайдах тэриллэрин ыйытта. Кини хамсыгынан сибээстээн оҕо сайыҥҥы сынньалаҥын үбүлээһинин нуорматын үрдүөхтээҕин эттэ.

Алена Атласова оҕо лааҕырын аһылыгар болҕомтотун уурда. Ол эбэтэр аһылыкка үбүлээһин урукку таһымынан хаалбыт. Маныаха бородуукта сыаната биллэ ыараабытын ыйда. Кини оҕолор лааҕырга хаачыстыбалаах аһылыгынан аһыахтаахтар, онон аһылык күүстээх хонтуруолга киириэхтээх диэтэ.

Юрий Баишев сайыҥҥы сынньалаҥ кэмигэр оҕо успуордунан дьарыктаныахтааҕын эттэ. Онон успуорт министиэристибэтэ успуорт лааҕырдарыгар эбии үбүлээһин көрөрүгэр көрдөстө уонна этиитин боротокуолга киллэртэрдэ.

Вера Никифорова лааҕырдар материальнай-тэхиньиичэскэй туруктарын ыйытта. Ону сэргэ, Счетнай палаата ыйбыт итэҕэстэрин туоратыыга туох үлэ барбытын чуолкайдаста.

“Төгүрүк остуол” түмүктүүр чааһыгар Феодосия Габышева уонна Алена Атласова бары кыттыылаахтарга махталларын биллэрдилэр. Парламентарийдар бары этиилэр учуоттанан, эрэкэмэндээссийэ буолуохтара диэн бэлиэтээтилэр.