Отчуоту СӨ үпкэ миниистирэ Валерий Жондоров билиһиннэрдэ. Сыл устата өрөспүүбүлүкэ эрдэтээҕи барыллаан бүддьүөтэ үс төгүллээн уларыйбыт. Ол түмүгүнэн, отчуоттуур кэм устата барыллаан дохуот 253 428 823 тыһ. солк, ороскуот – 260 589 828 тыһ. солк., дэписиит – 7 161 006 тыһ. солк. тэҥнэспит. Оттон дьиҥнээхтик хааһынаҕа 249 785 137,8 тыһ. солк дохуот киирбит (барыллаан былаан 98,6 %-нын ылар). Маныаха нолуоктан киирбит дохуот 8 175 573,8 тыһ. солк. буолбут. Былааннаммыт 263 746 302 тыһ. солк. ороскуоттан, дьиҥнээхтик 248 646 256,6 тыһ. солк. ороскуоттаммыт. Онон 2020 сыллааҕы бүддьүөт 1 138 881,2 тыһ. солк. ордуктаах (профициттаах) туолбут.
Норуот дьокутааттара Евгений Кожухов уонна Виктор Федоров кэккэ ыйытыылары көтөхтүлэр. Евгений Кожухов өлүүлээн тутууга албыннаппыт дьон кыһалҕаларыгар тохтоото. Виктор Федоров чааһынай уһуйааннары үбүлээһин боппуруоһун таарыйда. Кини эбии субсидияҕа 85 мөл. солк. ирдэнэр диэтэ. Валерий Жондоров үөрэхтээһин эйгэтин толору хааччыйарга 1 млрд. 200 мөл. солк. тиийбэтин ыйда. Ол гынан баран, “2021 сыллааҕы бүддьүөт күһүҥҥү көннөрүүлэригэр итэҕэс суума учуоттаныаҕа” диэн хоруйдаата.
Вице-спикер Виктор Губарев 2020 сыл устата дьадайыыны утары үлэ түмүктэрэ соччо бэрдэ суохтарын бэлиэтээтэ. Онон дьон-сэргэ уйгутун тупсарарга билигин олоххо киирэ турар миэрэлэри анаалыстаан көрөргө этии киллэрдэ.
Госдума дьокутаата Гаврил Парахин үөрэх эйгэтигэр үлэлиир чааһынай тэрилтэлэр үбүлээһиннэригэр болҕомтону тарта. Кини чааһынай уһуйааннары уонна оскуолалары үлэлэтэр урбаанньыктары көҕүлүүргэ этии көтөхтө. “Кинилэр оскуолаларга уонна уһуйааннарга миэстэ тиийбэт кыһалҕатын быһаараллар”, – диэн бэлиэтээтэ.
Куоластааһын түмүгүнэн, норуот дьокутааттара отчуоту ылыннылар.
-
0
-
0
-
0
-
0
-
0
-
0
