РФ судаарыстыбаннай тэрилтэлэрин уонна уопсастыбаннай көрүүтүн-истиитин үлэһиттэрин бүтүн Арассыыйатааҕы идэлээх сойуустарын бэрэссэдээтэлин солбуйааччы Ольга Шелобанова Дьокуускайга “РФ судаарыстыбаннай тэрилтэлэрин уонна уопсастыбаннай көрүүтүн-истиитин үлэһиттэрин бүтүн Арассыыйатааҕы идэлээх сойуустарын тэрээһинигэр уонна каадыр өттүнэн бөҕөргөтүүгэ” аналлаах эрэгийиэннээҕи сэминээр мунньахха кыттаары кэллэ. Бу тэрээһин киин куоракка балаҕан ыйын 22 күнүттэн 24 күнүгэр диэри ыыытыллара былааннанар.
Көрсүһүүгэ Сахалиннааҕы судаарыстыбаннай тэрилтэлэр уонна уопсастыбаннай көрүү-истии үлэһиттэрин идэлээх сойууһун бэрэссэдээтэлэ Лидия Шарухина, Саха сиринээҕи судаарыстыбаннай тэрилтэлэр уонна уопсастыбаннай көрүү-истии үлэһиттэрин идэлээх сойууһун бэрэссэдээтэлэ Вячеслав Алексеев кытыннылар.
“Үлэһиттэр үлэҕэ бырааптарын уонна социальнай өттүнэн көмүскэллээх буолууларын хааччыйыыга идэлээх сойуустар улахан өҥөлөөхтөр. Бу буолаары турар эрэгийиэннээҕи сэминээр мунньахха үгүс сытыы кыһалҕалары дьүүллэһиэхпит. Манна ылыллыбыт быһаарыылар уонна санаалар идэлээх сойуустар хамсааһыннарын инники сайдыыларын сүрүн эркээйилэрин ыйыахтара”, – диэн Антонина Григорьева бэлиэтээтэ.
Ил Түмэн вице-спикерэ Саха сирин парламена үлэҕэ сыһыаннаах сокуоннары тупсарыыга идэлээх сойуустары кытта көхтөөхтүк үлэлиирин тоһоҕолоото. Кини хамнас төлөбүрүн систиэмэтин тупсарыыга, үлэ миэстэтин көмүскээһиҥҥэ уонна оннунан хаалларыыга, сыыппара технологияларын сайыннарыыга, сокуоннары, нуормалары уонна быраабылалары оҥорууга идэлээх сойуустар оруолларын үрдэтиигэ, дойду иһинээҕи идэлээх сойуустар сибээстэрин бөҕөргөтүүгэ элбэх уопсай сорудахтар туралларын эттэ. Антонина Афанасьевна идэлээх сойуустар үрдүкү салайар дуоһунастарыгар эдэрдэри уонна активистары туруоруохха наада диэн санаатын үллэһиннэ.
Антонина Григорьева ыалдьыттарга Ил Түмэн аатыттан “Мир саха: народное искусство” диэн өйдөбүнньүк бэлэх кинигэлэри туттарда.
-
0
-
0
-
0
-
0
-
0
-
0
