Госдумаҕа экологияҕа, айылҕа баайыгар уонна тулалыыр эйгэни харыстааһыҥҥа сис кэмитиэккэ «Кыылы эппиэтинэстээхик иитии туһунан» федеральнай сокуоҥҥа уларытыылары киллэриигэ экспертнэй сэбиэт мунньаҕа буолла.
Докумуоҥҥа суруллубутунан, эрэгийиэннэр боломуочуйаларын бэйдиэ сылдьар кыыллары бас билиигэ биэрии чааһыгар кэҥэтэргэ этиллэр. Кэмитиэт Бэрэссэдээтэлэ Дмитрий Кобылкин этэринэн, сокуон барыла уопсастыбаҕа киэҥ кэпсэтиини уонна дьүүллэһиини таһаарда. Ол иһин бу аһаҕас кэпсэтиигэ бары өттүттэн бэрэстэбиитэллэр ыҥырыллан көхтөөх кыттыыны ыллылар.
- Роспотребнадзор дааннайынан, сыл ахсын 400 тыһ. кэриҥэ киһи кыыл ытырбытын туһунан биллэрэр, ол иһигэр үгүс өттө көрүүтэ-истиитэ суох бэйдиэ сылдьар кыыллартан. Сыыппаралар эмиэ бу курдук тосту уларыйыыта суохтар. Хата, ол оннугар сорох эрэгийиэннэргэ төттөрүтүн үрдүүр. Ол иһин кэмитиэккэ киирэр көҕүлээһиннэр ахсаанын элбээһинэ эмиэ биир сүрүн биричиинэтэ буолар. Биһиги бу буппуруоска уопсастыбаҕа хайдыһыы тахсыбытын көрөбүт. Бу быһыыга-майгыга ким буруйдааҕын уонна буруйа суоҕун туһунан төһө баҕарар быһаарсыахпытын сөп. Биллэн турар, манна эбии быһаарыы ылыллара наада, — диэтэ кини. Парламент этэринэн, кэлиҥҥи сылларга улахан болҕомто приюттары арыйыыга ууруллубута. 2020 сылы кытта тэҥнээтэххэ, билигин дьэллик кыыллар приюттарын ахсаана 60% улаатта уонна 700-кэ тиийдэ.
- Ол эрэн, билигин даҕаны ыттар саба түһүүлэриттэн уонна ытыралларыттан үгүс дьон эмсэҕэлэнэр, ардыгар киһи өлөрүүтүн түбэлтэлэрэ эмиэ бааллар. Итиннэ ким даҕаны эмсэҕэлээбиттэргэ уонна кинилэр дьиэ кэргэттэригэр ылыныллыбыт дьаһалларга уонна тэрээһиннэргэ итэҕэтэр кыаҕа суох, — диэтэ Дмитрий Кобылкин.
- Сокуон барыла баар тиһиги уларыппат уонна приюттары суох оҥорбот. Эрэгийиэннэр бу быраактыканы салгыы ыытар былааннаахтарын туһунан этэллэр. Ол гынан баран, сокуон ирдэбиллэрин географическай балаһыанньанан толорор кыаҕа суох эрэгийиэннэр эмиэ бааллар, кинилэргэ бу боппуруос балай да эмиэ уустук. Биһиги дойдубут нэһилиэнньэтин 30%-на Уһук хоту, Сибиир уонна Уһук Илин оройуоннарыгар олорор. Бэйэ-бэйэлэриттэн ыраах сытар нэһилиэнньэлээх пууннарга маннык приюттары хайдах да тэрийэр табыллыбат. Сорох субъектарга приюттары тутар үп-харчы суох, оччотугар кыыллары быстах кэмҥэ тутар пууннар баар буолуохтарын сөп, — диэн эттэ парламентарий, - Бүгүн экспертнэй сэбиэккэ бары өттүттэн сытыы санаалар этилиннилэр: эрэгийиэннэртэн, уопсастыбаттан, былаас уорганнарыттан. Сорох түгэннэргэ утарсааччылар бааллар эрээри, санаабыт биир - кыылы иитии тиһигэ салгыы тупсарыыны ирдиир, оттон уопсай уонна сүрүн сорукпут – дьону көмүскээһин, - диэн сис кэмитиэт бэрэссэдээтэлэ түмүктээтэ.
-
0
-
0
-
0
-
0
-
0
-
0
