Сокуон барыла парламеҥҥа олунньу 28 күнүгэр киллэриллибитэ уонна билигин дойду үрдүнэн киэҥ кэпсэтиини тарта. «Дойду кэккэ субъектарынан бу проблема сытыытык турар, онон хас биирдии эрэгийиэн маны быһаарыыга туспа боломуочуйа сүктэриллиэҕэ. Ыттар саба түһүүлэриттэн оҕолор олохтон туорууллара алдьархай быһыы-майгы. Маннык быһылаан хатыламматын туһугар үлэлиэхтээхпит. Сокуон барылын дьүүллэһиини хайаан да аһаҕастык ыытыахпыт, бары эрэгийиэннэри видеокэмпириэнсийэ эрэсииминэн холбуохпут », — диэн бэлиэтээтэ парламент бэрэссэдээтэлэ Вячеслав Володин. Кини Госдуума Дьиэ кэргэн, аҕа, ийэ уонна оҕо аймах боппуруостарыгар кэмитиэтигэр оҕолору ыттартан көмүскүүр сокуоннай быһаарыыны бэлэмнииргэ сорудахтаабыта.
Сокуон барылынан эрэгийиэннэр сокуону оҥорон таһаарар уорганнарыыгар эбии боломуочуйалары биэрии көрүллэр. Оччотугар, приюттарга кыыллары тутар муҥутуур болдьоҕун уонна кыраасданнарга куттала суох буолууну мэктиэлиир быһаарыылары эрэгийиэннэр бэйэлэрин эппиэтинэстэригэр ылыныахтарын сөп.
Бу иннинэ Ил Түмэн бэрэссэдээтэлэ Алексей Еремеев Москубаҕа Госдуума дьиэ кэргэни көмүскээһин, аҕа, ийэ уонна оҕо боппуруостарыгар кэмитиэтин бэрэссэдээтэлэ Нина Останинаны кытта көрсөн “Кыылларга эппиэтинэстээх сыһыан уонна Арассыыйа Федерациятын кэккэ сокуоннарыгар уларытыылары киллэрэр туһунан” федеральнай сокуон 16 уонна 18 ыстатыйаларыгар уларытыылары киллэрэр туһунан» 853484-8 №-дээх федеральнай сокуон барылыгар Саха Сирин парламенын этиилэрин билиһиннэрбитэ, Ил Түмэн Сэбиэтэ сокуон барылын өйөөбүтүн иһитиннэрбитэ. Нина Останина Саха Сирин парламена ылынар быһаарыылара куруутун да дьоһуннаах, көнө сүрүннээх буолаллар диэн бэлиэтээн туран махталын биллэрдэ. Түмүккэ бу сытыы боппуруоһу федеральнай таһымҥа төһө кыалларынан суһаллык быһаарарга уолдьаста диэн биир санааҕа кэллилэр.
Сокуон барыла «Кыылларга эппиэтинэстээх сыһыан уонна Арассыыйа Федерациятын кэккэ сокуоннарыгар уларытыылары киллэрэр туһунан» федеральнай сокуону Арассыыйа Федерациятын субъектара сокуону оҥорор уорганнара кыыллары приюттарга тутар уонна кыраасданнарга куттал суох буолуутун мэктиэлиир атын да быһаарыылары бэйэлэрэ ылынар боломуочуйаларын туһунан балаһыанньанан ситэрэн биэрэр соруктаах оҥоһулунна.
Санатан эттэххэ, 2024 с. от ыйын 26 күнүгэр ылыллыбыт «Саха Өрөспүүбүлүкэтигэр хаһаайына суох кыыллары (ыттары) дьаһайыы бэрээдэгин олохтуур уонна оннук дьаһаллар кэрискэлэрин быһаарар туһунан» сокуоҥҥа быстах көрөр пууҥҥа угуллубут, хаһаайына суох дьэллик ыты ким да иитэ ылбатаҕына, тутуллубута 31-с хонугар, ханнык төрүөттэргэ олоҕуран өлөрүөххэ сөбүн туһунан ыйар нуорма киллэриллибитэ. Хаһаайына суох дьэллик кыыллар (ыттар) ахсааннарын сааһылыыр уонна хаһаайына суох дьэллик ыттар саба түһүүлэртэн дьон олоҕун, доруобуйатын араҥаччылыыр инниттэн итинник нуорма олохтоммута. Ол эрээри, кыыллары көмүскээчилэр Үрдүкү суукка үҥсэннэр, дьиҥэ суоҕунан ааҕыллыбыта.
Дьэллик ыттар саба түһүүлэриттэн кыраасданнары араҥаччылыырга туһуламмыт федеральнай сокуон барылын Быһаарыы суругар күннээҕи олох көрдөрөрүнэн, хаһаайына суох дьэллик ыттары приюкка тутан, эмтээн-томтоон, чииптээн баран, үөскээбит эйгэлэригэр төттөрү ыытан кэбиһии нэһилиэнньэҕэ куттал суох буолуутун хааччыйбата диэн этиллэр.
Хаартыска: Госдуума саайта
-
0
-
0
-
0
-
0
-
0
-
0
