Муус устар 14 күнүгэр Гаврил Павлович РФ Киин быыбардыыр хамыыһыйатын бэрэссэдээтэлин Элла Памфилова илиититтэн саҥа дастабырыанньатын тутта.
Гаврил Парахин Госдумаҕа Саха сирин, Камчатка, Чукотка, Магадан уобалаһын уонна Хабаровскай кыраай интэриэстэрин көмүскүүр буолуоҕа. Гаврил Павлович бэйэтин инники былааннарын туһунан субу курдук санаатын үллэһиннэ:
– РЛДП баартыйаттан Госдума дьокутаатын мандаата миэхэ бэриллэрин туһунан биһиги лиидэрбит Владимир Жириновскай бэйэтэ биллэрбитэ. Ол кэннэ элбэх бэрэбиэркэни аастым.
Владимир Жириновскай Уһук Илиҥҥэ уонна Саха сиригэр улахан болҕомтотун уурар. Онон кини Госдумаҕа Уһук Илинтэн элбэх дьокутаат баар буолуохтааҕын мэлдьи этэр. Владимир Вольфович Уһук Илиҥҥэ баартыйа, бүтүн дойду сайдыытын туһугар кыһаллар Гаврил Парахин баарын туһунан билэр. Онон дьокутаат мандаата миэхэ бэриллэрин туруоруста.
Госдума дьокутаатын мандаата – Саха сирин олохтоохторугар барыларыгар Владимир Жириновскайтан үчүгэй бэлэх. Мин санаабар, Госдума аныгыскы ыҥырыылаах мунньаҕар мандааппын салгыы илдьэ хааларым буолуо. Ол курдук, Владимир Жириновскай Уһук Илинтэн элбэх дьокутаат баар буолуохтааҕын элбэхтик эппитэ. Онон, миигин баартыйа испииһэгэр киллэриэхтэрэ диэн эрэллээхпин.
Билигин Москваҕа көһөр санаам суох. Үгэс курдук, РДПР дьокутааттара миэстэтигэр олорон үлэлииллэр. Ол гынан баран, Уһук Илин эрэгийиэн устун элбэхтик айанныаҕым. Биллэн турар, Москваҕа эмиэ үлэлиэҕим. Ол эрээри, сүрүн болҕомтобун Саха сиригэр ууруоҕум. Бастатан туран, Госдумаҕа мин сүрүн сорукпунан – Саха сиригэр нолуогу кыччатыы буолуоҕа.
Билигин миигин элбэх командировка күүтэр. Дьиҥэ, мин сөмөлүөтүнэн көтөрбүн, чаһы уларыйарын сөбүлээбэппин. Ол гынан баран, Саха сирин сенатордара уонна дьокутааттара бары оннук үлэлииллэрин билэбин. Холобур, Федот Тумусов уонна Егор Борисов мэлдьи айанныыр түбүктээхтэр. Онуоха доруобуйа уонна тулуур ирдэнэр. Мин онно барытыгар бэлэммин! – диэн Гаврил Павлович санаатын үллэһиннэ.
Санаттахха, Госдумаҕа Саха сириттэн “Биир ньыгыл Арассыыйаттан” Галина Данчикова уонна “Сиэрдээх Арассыыйаттан” Федот Тумусов үлэлииллэр. Онон Гаврил Парахин үһүс дьокутаат буолла.
2021 сыл балаҕан ыйын 19 күнүгэр Госдума VIII ыҥырыылаах мунньаҕын быыбара буолара күүтүллэр.
-
0
-
0
-
0
-
0
-
0
-
0
