Госдумаҕа тэриллибит парламент истиилэригэр модераторынан уонна сүрүн дакылааччыгынан Госдума аграрнай боппуруостарыгар кэмитиэтин бэрэссэдээтэлэ Владимир Кашин буолла. Истиилэргэ өссө Ил Түмэн тыа сиригэр уонна аграрнай бэлиитикэҕэ сис кэмитиэтин бэрэссэдээтэлэ Андрей Находкин, Мэҥэ Хаҥалас улууһун Мөҥүрүөн нэһилиэгин дьаһалтатын баһылыга Иннокентий Андросов кытыннылар.
Петр Гоголев этиитигэр тыа хаһаайыстыбатын сөптөөх сир ресурсатынан хааччыйыы боппуруоһа таарылынна. Кини истии кыттыылаахтарын Саха сирин усулуобуйатыгар сылгыны үөрдээн иитии ньымаларын кытта билиһиннэрдэ. Саха сылгыта 8 ыйдаах кыстыгы туйаҕынан хаары хаһан аһаан туоруур уратытын Госдума дьокутааттарыттан үксүлэрэ саҥа истибит буолуохтарыгар сөптөөх. Дьиэ сүөһүтүн иитиини тупсарарга уонна сайыннарарга, үрдүк хаачыстыбалаах аһылык базатыгар тэҥнэнэр ньүөл бэйэлээх мэччирэҥнэр, үрдүк үүнүү баһыллар оттонор ходуһалар наадалар. Петр Гоголев итини этэн туран, парламент истиилэрин сүбэлэрин бырайыактарыгар мелиорация комлексын сайыннарыы боппуруоһа киирбитин өйөөтө уонна бу боппуруоһу «саамай бастакы эрээккэ аан бастакынан киллэрэргэ» этии оҥордо.
Петр Гоголев салгыы өртөөһүнү бобуу түмүгэр, Саха сиригэр тыа хаһаайыстыбатын сирэ-уота улаханнык кэхтибитин, дьүдэйбитин бэлиэтээн эттэ. Өртөөһүнү бобуу, бастатан, дьиэ сүөһүтүн хаачыстыбатыгар олус куһаҕан дьайыыны оҥорор. Сүөһү биэрэр бородууксуйатын хаачыстыбата улаханнык мөлтүүр. Чуолаан сылгы араас ыарыыга хаптарар, сир-уот, ходуһа, мэччирэҥ олус дьүдэйэннэр, быраҕыллар туруктаналлар. Ити барыта өртөөһүнү, ол аата айылҕаҕа, тулалыыр эйгэҕэ саньытаарынай ыраастааһыны ыытыыны бобууну кытта сибээстээх.
«Оттонор уонна мэччирэҥ сир-уот биһиэхэ 778,3 тыһ. гааҕа тэҥнэһэр, – диир Ил Түмэн бэрэссэдээтэлэ, – ити тыа хаһаайыстыбатыгар аналлаах сир-уот уопсай иэнин 87,9 % ылар. Урукку кэмҥэ биһиги сылын аайы 30-туу тыһ. гаа сиргэ өртөөһүнү ыытар буоларбыт. РФ Бырабыыталыстыбатын уурааҕынан бигэргэммит уот баһаарын утары эрэсиим быраабылаларынан уонна «Уот баһаарыттан куттал суох буолуутун туһунан» ФС-ҥа сөп түбэһиннэрии быһыытынан, тыа хаһаайыстыбатыгар аналлаах сирдэргэ кутаа оттунар, хаппыт оту, хадьымалы, бөҕү-сыыһы уоттуур бобуллар.
Биһиги уот баһаара олус сэрэхтээҕин уонна алдьархайдаах алдьатыылааҕын кимтэн да итээбэккэ туран, бэркэ диэн билэбит. Оттон өртөммөт, ол аата ыраастаммат сир-уот бэйэтин аналлаах туһатыттан үйэ саас тухары тахсарын, маннык дьылҕаламмыт сир-уот уопсастыбаҕа сүтэрин, өлөрүн өссө үгүстэртэн ордук сытыытык уонна ыарыылаахтык билэр уонна өйдүүр буолуохтаахпыт».
Петр Гоголев салгыы Саха Өрөспүүбүлүкэтигэр урут өртөөһүнү ыытыыны сүрүннүүр сокуон олох куһаҕана суох- тук үлэлээбитин ахтан аһарда. Туохха барытыгар саамай кылаабынайынан тустаах эппиэтинэс буоларын санатан туран, Ил Түмэн Бэрэссэдээтэлэ субьектар эппиэтинэстээх сыһыаннарын туһунан үчүгэйдик толкуйдаммыт быһаарыы ылыллан, кинилэргэ бу боппуруоска сокуоҥҥа олоҕурбут боломуочуйалары сүктэрэргэ этии киллэрдэ.
Петр Гоголев парламент истиитин кэнниттэн, инстаграммҥа бэйэтин страницатыгар РФ Тыатын хаһаайыстыбатын министиэристибэтин аатыгар, Саха сирин олохтоохторун кыһалҕаларын өйдүүрүн иһин, махтанар тыллары суруйда. Уонна салҕаан «Тыа хаһаайыстыбатын сирдэрин көдьүүстээхтик эргииргэ тардыыга уонна мелиорация комплексын сайыннарыыга туһуламмыт судаарыстыбаннай бырагыраама бырайыагын РФ Бырабыыталыстыбата көрүөхтээҕэ уонна сөбүлэһиннэриэхтээҕэ бүтэр уһугар чугаһаан иһэр. РФ Тыатын хаһаайыстыбатын министиэристибэтэ бу сылга Дьокуускайга ыытыахтаах көһө сылдьар сүбэ мунньаҕар Аартыкаҕа уонна Уһук хоту сиргэ бэтэринээр сулууспатын сайдыыта дьүүллэһиллиэҕэ», – диэн кини эрдэлээн иһитиннэрдэ
Петр Гоголев этэринэн, органическай уонна тупсарыллыбыт тыа хаһаайыстыбатын бородууксуйатын оҥорон таһаарыыга, ону батарар ырыынагы олохтооһуҥҥа эрэгийиэннэр кыттыгас көҕүлээһиннэрэ наада.
-
0
-
0
-
0
-
0
-
0
-
0
