- Ыарахаттартан күүһүрэн эрэ иһэрбитин Ил Дархан Анал этиитэ өссө төгүл бигэргэттэ. Айсен Сергеевич Анал этиитин быйылгы сылга көрсүбүт ыарахаттарбытыгар тирэҕирэн оҥордо. Олус уустук сыл түмүктэнэн эрэрин бары билэбит. Коронавирус тарҕаныыта, кураан сайын уонна улахан баһаардар. Оннук да буолуохтаах -- ити уустук боппуруостары өрөспүүбүлүкэ салалтата хайдах быһаарарыттан эһиилги кэлэр сылбыт быһаччы тутулуктааҕын бары да өйдүүбүт.
Ити үлүгэрдээх ыарыыга сутуллуу, аан дойду таһымыгар кытта улахан кириисис ааҥнаан турдаҕына, биһиэхэ доруобуйа харыстабылыгар элбэх саҥа сүүрээн, улахан тутуулар, техническэй модернизация бара турарын сэргии иһиттибит. Быйыл эрэ буолбакка, эһиил эмиэ тыаны араҥаччылыыр сулууспаҕа федеральнай бүддьүөттэн урут көрүллэ илик үп туруорсулунна.
Уот кураан, аһыҥалаах сайын бүрүүкээн, от аанньа үүммэккэ, баһаардар мэһэйдээн, сороҕо оттоммокко, кыстыгы туоруурга итээбит оту атын регионнартан, улуустартан тиэйиигэ, оттооһуҥҥа 200 -тэн тахса мөл.солк.көрүлүннэ. Эһиилги бүддьүөккэ эмиэ ити сорукка кырата суох харчы былааннанна. Тыа сиригэр олорор-үлэлиир, тыа хаһаайыстыбатынан дьарыгырар биирдиилээн дьоммутугар, тэрээһиннээх хаһаайыстыбаларга үбүлээһин хаһааҥҥытааҕар да улаата турарын Ил Дархан өссө төгүл бигэргэттэ! Ол курдук, тыа хаһаайыстыбатын сайдыытыгар 12,5 млрд. көрүлүннэ.
Айсен Сергеевич Анал этиитин эрэллээхтик, санаата көтөҕүллэн туран эппитин уонна ситиһиллибит кирбиилэринэн итэҕэтиилээхтик дакаастаабытын биир бэйэм астына иһиттим. Ааспыт сыл уустуктарын эрдээхтик уйунан, өрөспүүбүлүкэ көрсүбүт ыарахаттарын үрдүкү таһымҥа дакаастаан, ботуччу үп-харчы көрдөттөрөн, дойдубут инники кэскилин туһугар санаатын түһэрбэккэ, өссө күүһүрэн туран, сыал-сорук туруорар салайааччы дьонун-сэргэтин хайаан да сайдыыга сирдииригэр саарбахтаабаппын. Өссө төгүл тоһоҕолуубун, нэһилиэнньэ, дьоммут-сэргэбит өйөбүлүнэн уонна түмсүүбүтүнэн туруоруллубут сыалы-соругу ситиһиэхпит.
Ийэ сыла биллэриллибитин биһириибин. Тыа сиригэр судаарыстыбаттан өйөбүлү ылан, элбэх оҕолоох эдэр ийэлэр, дьиэ кэргэттэр баар буолан эрэллэрэ үчүгэй. Кинилэр, ити ыаллар тыа сирин сүрүн систэрэ буолалларын бары билэбит. Биэстэн элбэх оҕолоох ийэлэр судаарыстыбаттан ылыахтаах көмөлөрүн кэмигэр ылбакка, уочарат 1500 чугаһаабыт. Эһиил 200 мөл.солк. эрэ көрүллүбүтэ, ол боппуруоһу быһаарбата чахчы. Ол иһин Ил Дархан ити кыһалҕаны быһаарарга чопчу сорук туруорда. Онон кэлэр Ийэ сылыгар анал былаан оҥоһуллан, ити боппуруос төрдүттэн быһаарылларыгар, эбии үбүлээһин көрүллэригэр салгыы бииргэ үлэлэһиэхпит.
-
0
-
0
-
0
-
0
-
0
-
0
