Сокуон барылыгар киллэриллибит саҥа ыстатыйа хотугу төрүт норуоттар бырааптарын көмүскүөҕэ. Биллэрин курдук, тустаах сокуон барылыгар ити көннөрүүнү Ил Түмэн дьокутааттара киллэрбиттэрэ. Бу этиини Хоту сир, Сибиир уонна Уһук Илиҥҥи регион аҕыйах ахсааннаах норуоттарын Ассоциацията өйөөбүтэ.
Арассыыйа Арктикатын түөлбэтигэр Саха сирин 13 улууһа, Мурманскай уобалас, Чукотка, Тюмень уобалаһын Ямало-Ненецкэй автономнай уокуруга, Архангельскай уобалас Ненецкэй автономнай уокуруга, Красноярскай, Архангельскай уобаластар, Коми сорох сирдэрэ киирсэллэр.
Сыл анараа өттүгэр Ил Түмэҥҥэ Госдуматтан «Россия Федерациятыгар Арктика түөлбэтигэр предпринимательствоны судаарыстыба өттүттэн өйүүр туһунан» диэн сокуон барыла киирбитэ. Ити барыл тула спикер Петр Гоголев салалтатынан төгүрүк сылы быһа күүстээх үлэ барбыта.
Ил Түмэн Госдумаҕа тустаах сокуон барылыгар өрөспүүбүлүкэ нэһилиэнньэтин интэриэһин учуоттуур 12 этиини бэлэмнээн киллэрбитэ уонна ити туруорсуулар учуоттаналларыгар үгүс үлэни ыытта.
Парламентарийдарбыт салгыы сокуон хотугу аҕыйах ахсааннаах төрүт норуоттар олорор миэстэлэрин, ураты харыстанар айылҕалаах ытык сирдэри таарыйбатын, кинилэргэ дьайбатын курдук үлэни ыыта сылдьалларын бэлиэтиибин. Маны таһынан тустаах сокуон барылыгар федеральнай уорганнар уонна салайар хампаанньалар сири күүс өттүнэн ылар, былдьыыр (изъятие) диэн өйдөбүллээх ыстатыйаны уһулар наадатын туһунан Ил Түмэн дьокутааттарын этиилэрэ учуоттаныаҕа. Парламентарийдар өссө олохтоох кадрдары үлэнэн хааччыйыыны, бизнес социальнай эппиэтинэстээх буолуутун, резидент олохтоох бэйэни салайыныы уорганын кытта сөбүлэһии түһэрсэн эрэ баран тутууну ыытарын сокуонунан бигэргэтэр наадатын туруорсаллар.
-
0
-
0
-
0
-
0
-
0
-
0
