Россия бырабыыталыстыбатын баһылыга Михаил Мишустин COVID-19 ыарыыга сыстан дьиэтигэр олорорго күһэлиннэ. Ити туһунан кини президент Владимир Путиҥҥа биллэрдэ, диэн «Россия-24» телевидение ханаала иһитиннэрдэ.
«Коронавируска туттарбыт тестэрим түмүгэр ыарыы бигэргэтиллибитин туһунан бу аҕай билиннэ. Манан сибээстээн уонна Роспотребнадзор ирдэбиллэригэр сөп түбэһиннэрэн, мин дьиэҕэ олорууну тутуһуохтаахпын, кэллиэгэлэрбэр кутталы үөскэппэт туһугар бу наадалаах», — диэтэ Мишустин Путиҥҥа видеосибээһинэн тахсарыгар.
Премьер-миниистир бырабыыталыстыба үлэтин урукку режиминэн салгыаҕын эттэ, оттон миниистирдэр кабинеттарын баһылыгын быстах толорооччунан бастакы вице-премьер Андрей Белоусовы аныырга этии киллэрдэ. Путин этини өйөөтө уонна бүгүн ыйаахха илии баттыырга эрэннэрдэ.
«Эйиэхэ билигин итинник буолбута хас биирдии киһиэхэ буолуон сөп», — диэтэ Путин, Мишустиҥҥа үлэтин иһин махтанна. Президент урукку өттүгэр дьүүллэһиллибит боппуруостарга быһаарыылары ылынарыгар Мишустины кытта сүбэлэһэрин салгыаҕар эрэннэрдэ.
«Эн санааҕын истибэккэ эрэ, эйиигин кытыннарбакка эрэ бүтэһиктээх быһаарыылар ылыллыахтара суоҕа», — диэтэ Путин итиэннэ Мишустиҥҥа түргэнник үтүөрэ охсоругар баҕарда, балыыһаттан эрийэ турарыгар көрдөстө.
Бэйэтин өттүттэн Мишустин Россия олохтоохторуттан ыам ыйын бырааһынньыктарын кэмигэр бэйэлэрин доруобуйаларыгар муҥутуур эппиэтинэстээхтик сыһыаннаһалларыгар көрдөстө.
Манна даҕатан эттэххэ, кулун тутар 27 күнүгэр COVID-19 ыарыыга сыстыбытын туһунан Великобритания премьер-миниистирэ Борис Джонсон биллэрбитэ. Кини бастаан бэйэтин эбээһинэстэрин дьиэтиттэн толоро олорбута, ол эрээри ити кэннэ бырабыыталыстыба баһылыгын эбээһинэстэрэ Британия МИД баһылыгар Доминик Раабка бэриллибиттэрэ. Муус устар саҥатыгар Джонсоны балыыһаҕа киллэрбиттэрэ, онтон туруга мөлтөөбүтүгэр интенсивнай терапия отделениетыгар көһөрбүттэрэ. Ол эрээри номнуо 3 күнүнэн Джонсоны көннөрү палаатаҕа аҕалбыттара. Муус устар 12 күнүгэр бырабыыталыстыба баһылыга балыыһаттан үтүөрэн тахсыбыта. Ый бүтүүтэ кини бэйэтин офиһыгар үлэтигэр төнүннэ.
-
0
-
0
-
0
-
0
-
0
-
0
