“Атырдьах ыйыгар Бэс Күөлүн олохтоохторун кытта көрсүбүтүм, – диэтэ А.Н. Жирков. – Оччолорго “уокка былдьаммыт түөлбэни 2-3 ый иһигэр чөлүгэр түһэриэхпит” диэн биһиги Ил Дархаммыт Айсен Николаев этиитэ кэмигэр туоларын саарбахтыыр балайда этэ.
Ил Дархан сорудаҕа туолла. Кылгас кэм иһигэр дьон дьиэлэннэ, уокка былдьаммыт атын даҕаны тутуулар саҥалыы тутулуннулар. Уоту утары уонна айылҕа быһылааныгар эмсэҕэлээбити чөлүгэр түһэриигэ дьон-сэргэ бииргэ тутуһар, бэйэ-бэйэҕэ көмөлөсүһэр амарах санаата ордук бөҕөргөөтө, былаас, салалта кыһарҕаннаах кэмҥэ олохтоох дьон кыһалҕатын тэҥҥэ ылынарыгар, көмө-тирэх баар буоларыгар итэҕэлэ күүһүрдэ. Бэс Күөлүн олохтоохторун махталлара эйиэхэ биһиги өрөспүүбүлүкэбит Бырабыыталыстыбатын Бэрэссэдээтэлин бастакы солбуйааччытын быһыытынан сүрүн сорудахтаргын эмиэ маннык дьоһуннаахтык толороргор көмө-тирэх буоллуннар”.
Дмитрий Бердников Александр Николаевичка мэлдьи сүбэ-ама, көмө буоларын иһин истиҥник махтанна. Ону сэргэ Бэс Күөлүн олохтоохторугар, өрөспүүбүлүкэ дьонугар-сэргэтигэр түмсүүлээхтэрин, быһылаан содулун туоратыыга үлэлээбит бары дьоҥҥо үтүө сыһыаннарын иһин махтал тылларын эттэ.
Билэргит курдук, бу дьыл атырдьах ыйын 7 күнүгэр Горнай улууһун Бэс Күөлүгэр ойуур уота киирэн, олорор дьиэлэри, ферманы уо.д.а. тутуулары былдьаабыта.
Сонно Саха Өрөспүүбүлүкэтин Ил Дархана Айсен Николаев дьаһалынан өрөспүүбүлүкэ Бырабыыталыстыбатын Бэрэссэдээтэлин бастакы солбуйааччы Дмитрий Бердников салайааччылаах баһаар содулларын туоратыыга үлэлиир суһал ыстаап тэриллибитэ.
Кылгас кэм иһигэр Бэс Күөлүгэр 34 толору хааччыллыылаах олорор дьиэ тутулунна, сибээс ситимэ холбонно, саҥа хотоннор, 100 төбө сүөһү турар фермата, о.д.а. тутуулар үлэҕэ киирдилэр.
Суһал ыстаап үлэтин билигин да тохтоппот. Кини сорудаҕынан тутааччылар бэйэлэрин эбийиэктэрин туругун кыһыҥҥы кэм устатыгар кэтээн көрөллөр, көстүбүт итэҕэһи-быһаҕаһы утары туоратан иһэллэр.
- 0
- 0
- 0
- 0
- 0
- 0