Бу ыйаахха эрэгийиэннэр баһылыктарыгар эбии боломуочуйалары көрүү туһунан этиллэр. Чопчулаан эттэххэ, кинилэргэ аны мантан ыла экэниэмикэни өйүүр ыстааптары сүрүннүүр эбээһинэс сүктэриллэр.
Маны таһынан Владимир Путин туох баар социальнай төлөбүрдэри, ол иһигэр биэнсийэни, босуобуйалары, ону тэҥэ хамнас алын кээмэйин барытын үрдэтэргэ эттэ.
“Бу сыана үүнэ-тэһиинэ суох барыыта дьон дохуотугар оҕуста. Онон тииһинэн олоруу алын кээмэйиттэн саҕалаан, хамнаска тиийэ барытын улаатыннарыахпыт”, -- диэн эттэ РФ социальнай-экэнэмиичэскэй өйөбүлүгэр анаммыт мунньахха.
Аны туран, Саха Өрөспүүбүлүкэтин экэниэмикэтин миниистирэ Майя Данилова бу иннинэ этэн турар, “прочие” диэн кэккэҕэ ааҕыллар бүддьүөт эйгэлэрин үлэһиттэрин хамнаһа муус устар 1 күнүттэн 6,4%-ынан улаатарын туһунан.
— Суһал ыстаап мунньаҕар СӨ Бырабыыталыстыбата санкциялар утары киллэрэр миэрэлэригэр бырайыактары көрүү буолла. Бу дьаһал экэниэмикэҕэ суоһуур кутталы намыратарга туһуланар. Ол, сүнньүнэн, уматык (бэнсиин, гөрүүчэй, сэлээркэ) уонна бородуукта, бастакы уочарат туттуллар мал-сал, таҥас-сап сыаналарын үрдээһинин тохтотуу, тутуу, дьоҕус уонна орто урбааны өйөөһүн боппуруостара көрүлүннүлэр.
Өрөспүүбүлүкэ Ил Дархана Айсен Николаев бүддьүөт үлэһиттэрин хамнаһын 6,4% индексациялыыры уонна үрдэтэри өйөөтө. Былаан быһыытынан, алтынньы 1 күнүттэн ааҕыллыахтаах үрдээһин, ыксаллаах быһыы-майгы бүрүүкээбитинэн, бу муус устар 1 күнүттэн киириэ.
-
0
-
0
-
0
-
0
-
0
-
0
