Бу туһунан кулун тутар 16 күнүгэр Судаарыстыбаннай Дуума дьиэ кэргэҥҥэ, дьахтар уонна оҕо аймах дьыалаларыгар кэмитиэтин бэрэссэдээтэлэ Нина Останина (КПРФ) иһитиннэрдэ. Ол туһунан «Парламентская газета» суруйар.
Ийэ хапытаала оҕо төрөөтөҕүнэ эбэтэр оҕону иитэ ыллахха бэриллэр. 2022 сыллаахха маҥнайгы оҕоҕо төлөбүр 8,4% улаатан, билигин 524,5 тыһыынча солкуобайга тэҥнэстэ. Ийэ хапытаалын дьиэ кэргэн олорор усулуобуйатын тупсарарыгар, оҕо үөрэҕэр, доруобуйатыгар, о.д.а. дьоһуннаах сыалга туһаныахха сөп.
«Бу үптэн 50 тыһыынчатын уу харчынан биэрэр гына оҥоруохха наада… Бу өйөбүл бүддьүөккэ уларытыы киллэриини эрэйбэт, онон кыаллар суол», — диэтэ дьокутаат. Останина этэринэн, атын даҕаны сууманы (өссө элбэҕи) биэрэри толкуйдуохха сөп. “Маннык миэрэ киирэрэ уолдьаста. Буолаары буолан билиҥҥи балаһыанньаҕа”, -- диэтэ парламентарий.
«Биһиги саныырбытынан, ийэ хапытаалын сууматын индексациятын сылга биирдэ буолбакка, кыбаартал ахсын потребительскай сыанаттан көрөн үрдэтэн иһиэххэ сөп. Бу сааҥсыйалар киирбиттэринэн сөптөөх быһаарыы буолуо этэ», — диэн эбэн эттэ.
-
0
-
0
-
0
-
0
-
0
-
0
