Бүгүн бөртөлүөтүнэн Орто Халыма куоратыттан Сыбаатайга мүөттээх ыҥырыалар илдьилиннилэр. Уһук хотугу дойдуга ханнык хоһуун санаалаахтар бу саҥа көрүҥүнэн дьарыктанарга санаммыттарын туһунан тыа хаһаайыстыбатын улуустааҕы управлениетын начальнигын эбээһинэһин толорооччу Мария Александровна Шарина маннык кэпсиир:
– Былырыын Сыбаатай орто оскуолатыгар Дмитрий Дьячковскай диэн Чурапчы киһитэ дириэктэринэн ананан кэлбитэ. Кини оскуола базатыгар тыа хаһаайыстыбатын саҥа хайысхатын, мүөттээх ыҥырыаны иитиини, сайыннарыан баҕарарын, ол табылыннаҕына кэлэр өттүгэр Сыбаатай оскуолатын агро-оскуола оҥорорго үлэлэһиэххэ сөбүн туһунан эппитэ. Ону улуус баһылыга Евгений Слепцов өйөөн, көмөлөһөр соругу туруоран, биһиги 550 тыһыынча солкуобай харчыны көрбүппүт. Ол харчыга тирэҕирэн, Дмитрий Дмитриевич бастаан, кыһыҥҥы суолу баттаһа ыҥырыа уйаларын, атын да туттар тэриллэри аҕалбыта. Ааспыт субуотаҕа, ыам ыйын 21 күнүгэр, таһаҕас сөмөлүөтүнэн уон ийэ ууһа, ол эбэтэр тыһыынча кэриҥэ ыҥырыалары Хаҥалас Өктөмүттэн атыылаһан аҕалбыта. Дьэ ону бүгүн бөртөлүөтүнэн Сыбаатайга ыыттыбыт. Үчүгэйдик тиийбиттэр. Сыбаатай орто оскуолатын бэртээхэй бырайыага табыллан, оҕолорбут барахсаттар мүөт сииллэрэ туох куһаҕаннаах буолуой? Бу иннинэ биһиги улууска ыҥырыанан дьарыктаммыт киһи суох, онон сыбаатайдарга ситиһиилэри баҕарабыт.
Кыстык этэҥҥэ ааста, сүөһү-сылгы кэминэн. Быйыл түргэнник ситэр салааны сайыннарыыга Дьокуускайдааҕы көтөр фабрикатыттан 500 кууруссаны, Мархатааҕы хаһаайыстыбаттан 70 сибиинньэ оҕотун аҕалан, нэһилиэнньэҕэ тарҕаппыппыт. Аһылыктара табыллыбата дуу, биитэр наһаа кыралары ылбыппыт дуу, уонча боросуонак өллө, оттон кууруссалар үчүгэйдэр, сымыыттааннар дьоннор астыныы бөҕөлөрө.
-
4
-
0
-
0
-
0
-
0
-
0
