От ыйын 18 күнүнээҕи туругунан, Суордаах, Томтор, Бөтөҥкөс, Үҥкүр, Боронук уонна Боруулаах сэлиэнньэлэригэр халаантан эмсэҕэлээбит тыа хаһаайыстыбатын эбийиэктэрин, матырыйаалынай-тэхиньиичэскэй сыаннастары көрүү-истии, ааҕыы ыытылынна. Халаантан эмсэҕэлээһин бастааҥҥы докумуоннарын толорууга тустаахтарга көмө, сүбэ-ама оҥоһулунна. Барыллаан ааҕыы быһыытынан ууга былдьаммыттар: 7 хотон, 28 км. усталаах бүтэй, 469 туонна от (460 туонна кур от, 9 туонна быйыл оттоммут от).
Бүгүн, ол эбэтэр от ыйын 19 күнүгэр, тыа хаһаайыстыбатын улуустааҕы управлениетын үлэһиттэрэ Дьааҥы куоратыгар уонна Боронукка тахсаннар, халаантан эмсэҕэлээһин бастааҥҥы докумуоннарын оҥоро сылдьаллар.
Уу иһэр сураҕын истээт, нэһилиэктэр олохтоохторо барыта холбоон 2 537 ынах сүөһүнү, 421 сылгыны куттала суох үрдүк сирдэргэ таһаарбыттара. Томторго ынах сүөһү сүтүгэ тахсыбата, 984 сылгы ыраах учаастактарынан сайылыыллар. Бу нэһилиэккэ икки хотон уонна 1,5 км усталаах бүтэй ууга былдьаммыт. Суордаахха уу «Поюс холода» кэпэрэтиип үүтү тутар пуунун, арыыны уурар бадыбаалын уонна «Алгыс» кэпэрэтиип 50 ынахха анаммыт хотонун ылбыт. Үүт тутар пуун тэрилэ эмсэҕэлээбэтэх. Билигин төһө сууммалаах хоромньу таһаарыллыбыта ааҕыллар.
Маны таһынан өрүстэр сыһыыларынааҕы ходуһаны барытын уу ылбыт. Уу түстэр эрэ, оттооһун саҕаланыахтаах. Улуус сүөһүтүн-сылгытын кыстатарыгар 8 200 туонна от, 62 туонна комбикорм, 119 туонна эбиэс, 5 туонна туус наада. Билиҥҥи туругунан, улууска 2 163 туонна от оттонор кыахтаах, хаалбыт 6 037 туоннаны хааччынарга мобильнай биригэдэлэринэн ыраах учаастактарынан оттуур сорук турар.
– Билигин мобильнай биригээдэлэри тэрийии ороскуотун толуйуу боппуруоһа көрүллэ сылдьар. Хаһаайыстыбалар ходуһаттан уу түһэрин кэтэһэргэ тиийэллэр, уу түһүүтэ уһуох чинчилэннэҕинэ, атын учаастактарга оттуу бараллара ирдэнэр. Ол эрээри, уу түстэҕинэ даҕаны, халаан кумаҕынан уонна салахайынан тибэн, ходуһалар туһаларыттан тахсыбыттара буолуо диэн киһи дьиксинэр, – диир тыа хаһаайыстыбатын миниистирин солбуйаачы Николай Афанасьев.
Кини сарсын Дьааҥыга бараары олорор.
-
1
-
0
-
0
-
0
-
0
-
0
