Издательский дом Редакция Подписка
Погода в Якутске: . -12 oC

2021 сылтан тыа хаһаайыстыбатыгар өйөбүл саҥа мэхэньиисимэ киллэриллэн, кэтэх ыаллар ыанар ынахтарын ахсыгар 35 тыһыынча солкуобай бэриллэр буолбута.

2021 сылтан тыа хаһаайыстыбатыгар өйөбүл саҥа мэхэньиисимэ киллэриллэн, кэтэх ыаллар ыанар ынахтарын ахсыгар 35 тыһыынча солкуобай бэриллэр буолбута.

Бу мэхэньиисим үчүгэй өрүттэрин туһунан «Кыым» хаһыакка, кини саайтыгар уонна батсаап ситимигэр элбэхтик суруйбутум. Ону Тыа хаһаайыстыбатын министиэристибэтин 2018-2019-2020 сыллардааҕы от ыйынааҕы ньирэй төрөөһүнүн статистическай отчуоттарыгар олоҕуран оҥорбутум. Холобурдаан эттэххэ, ити сылларга үүт саамай ыанар кэмигэр, өрөспүүбүлүкэ үрдүнэн от ыйынааҕы туругунан, 70 тыһыынча 500 ынахтан 65 %-а, ол эбэтэр 45 тыһыынча төрүүр эбит. Оттон Тыа хаһаайыстыбатын министиэристибэтэ ити үөһэ этиллибит 70 тыһыынча 500 ынах барыта 100 % төрөөн, үүтү бары туттаралларын курдук, 80 тыһыынча туонна үүт былаанын улуустарынан тыырар.
От ыйдарынааҕы чахчыларынан көрдөххө, кытарах ынах ыаммат, үгүс ыал үүт туттарбат. Ол үрдүнэн, министиэристибэ тиэрдэр былаана (80 тыһыынча туонна үүт) 100 % туолар, онно көрүллүбүт 2 миллиард 800 мөлүйүөн үбүлээһин барыта туһаныллыбыт курдук көстөр. Манна өссө хатылаан эттэхпинэ, кытараабыт ынахтаах, ону таһынан төрөөбүтүн үрдүнэн үүтү туттарбат ыаллар субсидияны туһамматтара кимиэхэ баҕар өйдөнөр. 2021 сылга 36 тыһыынча кэтэх ыаллар ыанар ынахтарын ахсыгар 35-тии тыһыынча, 2022 сылга 39 тыһыынча ынахха 35-тии тыһыынча солкуобай бэриллибитин туһунан тыа хаһайыстыбатын министиэристибэтин анал отчуотугар этэр.
2021 сылга 57 тыһыынча туонна үүккэ былаан өрөспүүбүлүкэ үрдүнэн баар 70 тыһыынча 500 ыанар ынахха улуустарынан түҥэтиллибитэ, ол аһара толоруллан, 2022 сылга былаан 62 тыһыынча туоннаҕа тиэрдилиннэ. Манна тоһоҕолоон бэлиэтээтэххэ, быйылгы сылга 39 тыһыынча кэтэх ыаллар ынахтарыгар субсидия ылбыттартан, биир да киһи хаһыакка, батсаап ситимигэр арыы суоҕын туһунан айдааны тардыбат. Тоҕо диэтэххэ, кинилэр бэйэлэрин ынахтарыттан үүт ыан, сүөгэйдээн атыылаан, арыы оҥостон, харчыны оҥороллор. Манна кинилэри олох сүрэҕэ суохтарынан ааттаан туран, ынахтарын ньирэйдэрин кытта ыытан баран, сис туттан дьаарбайа сылдьар курдук этэр-тыынар, киһи сиэригэр-майгытыгар баппат. Баҕар, үүтэ суох эбэтэр ньирэйдэрэ мөлтөх туруктаах ынахтары ыыталлара да буолуо, күһүн кыстыкка туруктаах киирдин диэн.
Холобурдаан эттэххэ, Үөһээ Бүлүү Балаҕаннааҕар кэтэх ыаллар ынахтарын ыан, сүөгэйинэн атыылаан, харчы киллэринэн олороллорун билэбин. Иккиһинэн, өскөтүн ааспыт сылга үүт былаана (57 тыһыынча туонна) аһара туолбут, 2022 сылга 62 тыһыынча туонна даҕаны аһара туолар буоллаҕына, онтон оҥоһуллубут арыы ханна барарый диэн төттөрү ыйытыахха сөп этэ. Ол эбэтэр ыанар ынах төбөтүгэр ылбыт кэтэх ыаллар арыынан, сүөгэйинэн хааччыналларын аахсыбаттар дуу диэҕи баҕарыллар.
Ил Дархан Айсен Сергеевич Николаев өйөбүлүнэн 2021 сыллаахха олоххо киллэриллибит тыа хаһаайыстыбатын өйөбүлүн саҥа мэхэньиисимэ олус табыгастааҕынан, дьоҥҥо туһалааҕынан чуолаан биир сүрүн холобурунан бэлиэтиэххэ сөп: 2021 эрэ сылга тыа сирин ынахтаах ыала барыта, ол иһигэр кэтэхтэри бастатан киллэрэн туран, 100 % үбүлээһининэн аан бастаан туһаннылар, Айсен Сергеевич бэйэтэ этэринии, тыа дьонун бэйэлэрин сиэптэригэр, ханан да эргийбэккэ быһаччы харчы киирдэ, үбүлээһин оҥоһулунна.

Степан ДМИТРИЕВ,
Үөһээ Бүлүү Балаҕаннаах нэһилиэгин дьаһалтатын баһылыга,  Саха Өрөспүүбүлүкэтин норуотун хаһаайыстыбатын үтүөлээх үлэһитэ

  • 0
  • 0
  • 0
  • 0
  • 0
  • 0

Комментарии (0)

Никто ещё не оставил комментариев, станьте первым.

Оставьте свой комментарий

  1. Опубликовать комментарий как Гость.
Вложения (0 / 3)
Поделитесь своим местоположением