Үөһээ Бүлүү улууһун Балаҕаннаах нэһилиэгин ыччата, 34 саастаах Петр Кардашевскай 2016 сыллаахха Тыа хаһаайыстыбатын министиэристибэтин иһинэн «Саҥа саҕалыыр бааһынай хаһаайыстыба» бырагыраама гранынан үлэлээбитэ сэттис сылыгар барда. Граны ылыы бэрээдэгинэн, биэс сыллаах болдьоҕун төһө да толордор, салгыы үлэлии-хамсыы, хаһаайыстыбатын сайыннара сылдьар – билиҥҥи туругунан 84 ынах сүөһүлээх, ол иһигэр 27 ыанар ынахтаах.
Ороһу нэһилиэгэр 24 саастаах Айсен Түүлээхэп диэн эдэр киһи баар. Айсен бастаан убайа Александр 2017 сыллаахха «Саҥа саҕалыыр бааһынай хаһаайыстыба» бырагыраама гранын ылбытыгар, онно көмөлөспүтэ. Онтон 2021 сыллаахха «Агростартап» гранын куонкуруһугар хотон, грант ылан, билигин 100 сүөһү турар хотонун тутта сылдьар уонна “МТЗ” тыраахтары атыыласта. Күн бүгүн хаһаайыстыбатыгар 120 ынах сүөһүлээх, ол иһигэр 80 ыанар ынахтаах.
Быйыл сайын тохтоло суох ардахтар түһэннэр, Марха, Түҥ уонна Чыбыыда үрэхтэр уулара таһымнаан, Бүлүү өрүс сааскы курдук халааннаабыта. Ол түмүгэр, Дүллүкү, чуолаан Балаҕаннаах, Ороһу нэһилиэктэрин ходуһаларыгар элбэх кэбиһиилээх, урулуоннаах оттору уу ылан, хаһаайыстыбаларга улахан хоромньуну таһаарбыта. Сүөһү-сылгы ахсаанын аччаппат инниттэн, Петр Кардашевскай 90 туонна оту, туоннатын 8 тыһыынчаҕа атыылаһардыы нэһилиэк дьаһалтатын нөҥүө Тамалакаан, Далыр, Маҥаас нэһилиэктэрин кытта кэпсэтии ыыта сылдьар. Айсен Түүлээхэп Ньурба улууһуттан 230 туоннаны (туоннатын 7-8 тыһыынчаҕа) атыылаһарга дуогабардаһан, төлөбүрүн быһаарса сылдьар. Маны таһынан Петр 16 гектар, Айсен 80 гектар ыһыы сирдээхтэр, онтон күөх маассаны хомуйаллар. Эдэр уолаттар айылҕа оҥорбут уустуктарыттан толлубакка, чаҕыйбакка тыа хаһаайыстыбатын сайдыытыгар үлэлии-хамсыы сылдьалларын хайҕыахха уонна холобур туттуохха сөп.
Степан Дмитриев,
Үөһээ Бүлүү улууһун Балаҕаннаах нэһилиэгин баһылыга,
Саха Өрөспүүбүлүкэтин норуотун хаһаайыстатын үтүөлээх үлэһитэ
-
3
-
0
-
0
-
0
-
0
-
0
