СӨ Тырааныспарын уонна суолун хаһаайыстыбатын миниистирэ Владимир Сивцев кыһыҥҥы суоллар туруктарын, өрүһү туоруурга көҥүллэммит ыйааһыны кэстэххэ, ыарахан тиэхиньикэ кэнниттэн муус хайыта барарын туһунан иһитиннэрдэ.
Өрүстэри туоруурга муус халыҥ халҕаһата чөмөхтөһө сытара, хаар түһэн, тибии тибэрэ, улахан ыйааһыннаах массыыналар суолу алдьаталлара кэккэ уустуктары үөскэтэр. Суолу көрөр-истэр үлэни үбүлүүргэ федеральнай сокуоҥҥа дьыл кэмиттэн көрөн, сезоннай массыына суола диэн өйдөбүл суоҕа этилиннэ.
Миниистир суол айанньыттарга көнө уонна харгыһа суох буоларын хааччыйарга кыһыҥҥы суолу федеральнай сокуонунан бигэргэттэххэ, барыта санаа хоту буоларыгар саарбахтыырын эттэ.
Экэниэмикэ, инвестиция уонна бырамыысыланнас бэлиитикэтигэр сис кэмитиэт бэрэссэдээтэлэ Павел Петров быһааран биэрбитинэн, ороскуоту барытын өрөспүүбүлүкэ бүддьүөтүгэр сүктэриэхтэрин сөп.
«Сорох кыһыҥҥы суоллар нэһилиэнньэ олорбот эрээри, баахтанан үлэлиир бырамыысыланнас эбийиэгэр тиэрдэллэр. Көмүһү, таас чоҕу хостооччулар суолу өрөмүөннүүргэ, саҥардарга эмиэ кыттыһыахтаах этилэр. Өрөспүүбүлүкэ суолунан хааччыйар, оттон кинилэр дохуот ылаллар, олохтоох нэһилиэнньэ социальнай олоҕун тупсарарга улаханнык кыттыбаттар», — диэтэ Павел Петров.
Бу боппуруоһу салгыы сис кэмитиэт кэлэр мунньаҕар көрүөхтэрэ. Ону таһынан, өрөспүүбүлүкэ суолун көрөргө-истэргэ субсидия, дотация көрүллүөн сөбүн-суоҕун дьүүллэһиэхтэрэ.
Хаартыска: ааптар хаартыскаҕа түһэриитэ, уk24.ru
-
0
-
0
-
0
-
0
-
0
-
0
