Пуорум сүрүннээн үс тиэмэни тутуһан ыытыллыаҕа. Нэһилиэнньэ үпкэ-харчыга билиитин-көрүүтүн уонна култууратын үрдэтии, оҥоһук өйү-санааны сайыннарыы, Арассыыйа экэниэмиэкэтигэр каадырдары бэлэмнээһин курдук билиҥҥи кэмҥэ олус надаалаах хайысхаларынан барыаҕа. Ону таһынан, арассыйатааҕы эспиэрдэр кыттыылаах дискуссиялыыр сиэссийэлэр уонна “Фин Run” дьыалабыай оонньуу, сүүрүү былааннанар.
Саха Өрөспүүбүлүкэтин Үпкэ миниистирин э.т. Иван Алексеев бэлиэтииринэн: “Бу пуорумҥа РФ эрэгийиэннэрин үпкэ-харчыга үлэлэһэр уорганнарын, Арассыыйа Үпкэ министиэристибэтин, Арассыыйа Баанын, РФ Уһук Илин уонна Аартыка сайдыытыгар министиэристибэтин, Госдууманы, уопсайынан биһиги баан уопсастыбатын барытын ыҥырдыбыт. Сүрүн сорукпут - биһиги өрөспүүбүлүкэбитигэр бары үп уорганнара, баан филиаллара, эрэгийиэннээҕи АЭБ, Арассыыйа Баана бары биир ситимнээх үлэлэрин ыччат көҕүн нөҥүө көрдөрөргө уонна Саха Сиригэр үп хайысхата туруктааҕын, сайдарын биллэрэргэ дьулуһабыт”.
Сүрүн пленарнай сиэссиэйэҕэ Уһук Илин уонна Аартыка сайдыытын боппуруостарын, нолук тиһигин ситэрэн-хоторон, тупсарыыны көрүөхтэрэ. Ону кытта, “эдэр” эрэгийиэннэр Арассыыйа бүддьүөтүн тиһигэр киириилэрин уратыларын үөрэтиэхтэрэ, үп ырыынагын инникитин уонна кэм-кэрдии туох-ханнык ирдэбиллэри туруорарын дьүүллэһиэхтэрэ. Эрэгийиэннээҕи бааннар экэниэмикэ бөҕөргүүрүгэр уонна эрэгийиэн экэниэмикэтин сүрүн салааларын сайдыытыгар оруолларын үөрэтиэхтэрэ. Үлэ уопутун кытта үллэстиигэ уопсастыбаннай үбүлээһини уонна көҕүлээһиннээх бүддьүөтү хайдах олоххо киллэриини кытта билсии ураты миэстэни ылыаҕа диэн тэрийээччилэр бэлиэтииллэр.
СӨ Ил Дарханын уонна Бырабыыталыстыбатын дьаһалтатын пресс-сулууспата иһитиннэрэринэн, Иван Алексеев: “Пуорум кэмигэр киирбит этиилэр, үп эдэр үлэһиттэрэ бэйэлэрин кэллиэгэлэрин кытта уопуту атастаһыылара, билсиһиилэрэ үп салаатын сайдыытыгар эрэ буолбакка, дойдубут уонна өрөспүүбүлүкэбит экэниэмикэтин сайдыытыгар көмөлөһүөхтэрэ,”- диэн эрэнэрин биллэрдэ.
Хаартыскалар куйаар ситимиттэн ылылыннылар.
-
0
-
0
-
0
-
0
-
0
-
0
