Булгунньахтаах нэһилиэгиттэн чугас Саха Сиригэр саамай улахан Тойон Арыы, Буотама, Кыһыл элэһин диэн кумах тукулаан, Таас хоспох күрүлгэн, былыргы киһи уҥуоҕа Дириҥ Үрэх, хаһан эрэ сэлииттэн (мамонтан) үөскээн-төрөөн тахсыбыт бизоннар үөрдэрэ о.д.а. туристическай эбийиэктэр бааллар. Инникитин бу эҥээр археологическай туризмы сайыннарыахтаахтар.
Күн бүгүн Булгунньахтаахха туризм салаатыгар 26 урбаанньыт үлэлиир, кинилэр социальнай хантыраак ылан, куонкуруска кыттан, гыраан сүүйэн туристическай баазалары арыйаллар. Мэдиссиинэ туризмын хайысхатынан Уһун үйэлэнии киинин арыйан, биир сыл иһигэр 200 тахса киһи сылдьан, нэһилиэккэ 3 мөл. солк. тахса үп киирбит. Агротуризм чэрчитинэн өбүгэ төрүт дьарыгын илдьэ сылдьар Петровтар дьиэ кэргэттэрэ сайылыктарыгар туристары ыҥыран көрдөрөллөр, кинилэр дохуоттара 1 мөл. солк. куоһарбыт.
Олохтоохтор куораттан кэлбит дьону мотуордаах оҥочонон Өлүөнэ, Сиинэ очуостарыгар илдьэллэр. Сыл ахсын сынньана кэлэр дьон ахсаана элбээн, мотуордаах тыылар тохтуур аспаал кутуулаах аныгы причаллара тутуллуохтаах, массыына тохтобула, эбэни көрөн олорон сынньанар сир оҥоһуллуохтаах.
Биир сүрүн киэргэтии диэн уйаара-кэйээрэ биллибэт киэҥ өрүһү төгүрүччү көрөн олорор ууга уста сылдьар кафе тутуллан, элбэх киһи тоҕуоруйар сирэ буолуохтаах. Онон Булгунньахтаахха туризм күүскэ сайдан эрэр. Баһылык Айталина Васильева этэринэн, 2025 с. үбүлээччилэр көмөлөрүнэн Одун Хаан улахан туристическай киин, кафе тутуллуохтаах.
Василий Кононов хаартыскаҕа түһэриитэ.
-
0
-
0
-
0
-
0
-
0
-
0
