Кини тэрилтэ үп-харчы уонна хаһаайыстыбаннай отчуотун истэн баран сылы үчүгэйдик түмүктээбиттэрин бэлиэтээтэ. «Сахатранснефтегаз» генеральнай дириэктэрэ, Ил Түмэн дьокутаата Алексей Колодезников Ил Дархаҥҥа туруоруллубут сорук барыта ситиһиллибитин, 2025 с. саҥа былаан оҥоһуллубутун туһунан иһитиннэрбитэ.
Итиниэхэ гаастааһын бырагыраамата, дьиэлэр тиэхиньиичэскэй өттүнэн хааччыллыылара, хапытаалынай өрөмүөн, инвестиционнай бырайыактары олоххо киллэрии барыта киирэр.
Алексей Колодезников Телеграм-ханаалыгар сурулларынан, Накыыннааҕы гаас утаҕын тутуу салҕаныахтаах, өрөспүүбүлүкэ киин куоратын соҕуруу эҥээр тутуллар саҥа оройуоннарын гааһынан хааччыйарга Хатаска «Урожай -10» АГРС тиэхиньиичэскэй өттүнэн саҥардыллыахтаах, ньиэптээх учаастактары туһаҕа таһаарыахтаахтар. Саха Сирин гаастыырга саҥа былаан оҥоһуллуохтаах.
2021 сылтан саҕалаан, 2025 сылы киллэрэн туран 1000 км. уһуннаах гаас ситимэ тардыллыахтаах. Үбү-харчыны сөпкө туттуу бэлиитикэтин түмүгэр тастан куттал суоһуура аччатылынна. Хампаанньа нолуок чааһыгар бары эбэһээтилистибэтин, үлэһиттэр бары социальнай хааччыллыыларын толордо, ону ааһан, үлэлииргэ өссө үчүгэй усулуобуйаны тэрийэн, кэлэктиип дуогабара кэҥэтилиннэ, дьон тэрилтэттэн ылар көмөтө элбээтэ.
Былырыын гаас дэписиитин кэмигэр Дьокуускай куорат пассажирскай оптуобустарын болҕомто киинигэр ылан, убатыллыбыт углеводороднай гааһынан хааччыйдылар. 519 элбэх кыбартыыралаах дьиэ гааһын турбатын тиэхиньиичэскэй бэрэбиэркэтин ыыттылар, ол түмүгэр 3300 эргэрбит гаас оборудованиета саҥардылынна.
Хампаанньа генеральнай дириэктэрэ Айсен Сергеевичка уонна Саха Өрөспүүбүлүкэтин Бырабыыталыстыбатыгар гаас бырамыысыланнаһын үлэһиттэрин саҥа саҕалааһыннарын өрүү өйүүллэрин иһин барҕа махталын биллэрэр.
2024 сыл түмүгүнэн «Сахатранснефтегаз» федеральнай таһымҥа ситиһии үктэллэннэ, «Арассыыйа социальнай партнерствотын ситимигэр ньиэп-гаас, нефтегазохимическай бырамыысыланнас лидерэ» диэн үрдүк ааты ылла. Онон түгэнинэн туһанан, эрэдээксийэ аатыттан истиҥ эҕэрдэбитин тиэрдэбит!
Хаартыска: Алексей Колодезников Телеграм-ханаалыттан.
-
0
-
0
-
0
-
0
-
0
-
0
