Халыҥ хармааннаахтарга нолуогу үрдэтэр туһунан дойду баһылыга Владимир Путин быйыл сайын бэс ыйын 23 күнүнээҕи туһаайан этиитигэр көтөхпүтэ. Бэрэсидьиэн суоттуурунан, дойду хааһынатыгар эбии 60 млрд. солк. киириэҕэ. Бу үбү сэдэх ыарыылаах оҕолору эмтээһиҥҥэ туттарга этии киллэрбитэ.
Ити гынан баран, сокуон барылыгар эбии дохуот туох сыалга туттуллуохтааҕа чуолкай ыйыллыбат. Дьиҥэр, мунаах соҕус боппуруос. Тоҕо диэтэххэ, НДФЛ үбүн баһыйар өттө эригийиэннэр бүддьүөттэригэр киирэр: 85 бырыһыана Федерация субъегар, 15 бырыһыана – муниципальнайга. Маннык түбэлтэҕэ элбэх нэһилиэнньэлээх бөдөҥ куораттар сүүйүүлээх хаалыахтара. Ити Арассыыйа гражданнара тэҥ бырааптаах буолууларын мэктиэлиир РФ Конституциятын 19-с ыстатыйатын утарар.
Сокуон барылыгар ыйылларынан, 15 бырыһыан 5 мөлүйүөнтэн чорбойор сууматтан ааҕан тутуллуо. Ол аата ыйга 416 тыһ. солк. “үрүҥ” дохуоттаах эрэ киһи үрдэтиллибит нолуогу төлүүр буолуоҕа. Нолуок кодексын 224-с ыстатыйатыгар сөп түбэһиннэрэн, Арассыыйа олохтоохторо НДФЛ-ы хамнастан эрэ буолбакка, баайы-дуолу уонна сыаналаах кумааҕылары атыылааһынтан эмиэ төлүүллэр. Онон 15 бырыһыан баайдарга эрэ буолбакка, кыбартыыра атыылааччыларга кытта суоһуур.
-
0
-
0
-
0
-
0
-
0
-
0
