-Аан дойду үрдүнэн хамсык ыарыы турбутунан, үп-харчы эйгэтин үлэһиттэрэ уонна өрөспүүбүлүкэбит салайааччылара быйыл сыл бүтүүтүгэр үбүлээһин боппуруоһа олус уустук буолуо диэбиттэрэ. Биһиги, дьокутааттар, бүддьүөт үбүн бигэргэтиигэ, уларытыылары киллэриигэ элбэхтик үлэлээтибит. Үөрүөхпүт иһин, быйылгы бүддьүөт кэлин кэлбит 29 млрд. солк. киллэрэн туран, 253 млрд. солк. бүтэһиктээҕин бигэргэннэ. Инньэ гынан, үөрэхтээһиҥҥэ, доруобуйа харыстабылыгар иэс-күүс барыта сабыллар буолла.
Өрөспүүбүлүкэбит салайааччылара ырааҕы өтө көрөн үлэлээбиттэригэр махтаныах кэриҥнээхпит. М.Е.Николаев АЛРОСА хампаанньаны 1990-ус сылларга атаҕар туруорбута. Итинтэн дивидент киирэ турар. Пандемиянан сиэттэрэн атыыта-тутуута түстэр даҕаны, ньиэптэн, чохтон, газтан эмиэ нолуок харчыта киирэр. Холобур, Газпром 6,5 миллиарды көһөрдө.
Ил Дархаммыт Айсен Николаев күүскэ киирсэн, дойду 39 эрэгийиэнэ эбии үбү ылбытыттан биһиэхэ саамай элбэх тигистэ. Сылы үчүгэйдик түмүктүүр буоллубут. Дьон хамнастаныа.
Үүнэр 2021 сылга 229 млрд. солк. кээмэйдээх үп көрүлүннэ. Онтон кэлэр 2022 сылга 229 млрд., 2023 сылга 242 млрд. солк. торумнаммытын улахан барыллааһын ылылынна диэн ааҕабын. Өйбүтүн-санаабытын түмэн, биир сомоҕо буолуоҕуҥ. Үлэ-хамнас таһаарыылаах буолуо диэн эрэнэбин.
-
0
-
0
-
0
-
0
-
0
-
0
