Миниистир 2020 сыл иккис кыбаарталыгар бэлиэтэммит экэниэмикэ түһүүтэ этэҥҥэ туоратыллыбытын уонна экэниэмикэ эрэллээхтик үөһэ тахсан эрэрин туһунан иһитиннэрдэ. “Өскөтүн бырамыысыланнас оҥорон таһаарыытын индексэтэ 5,1 % түспүт буоллаҕына, алмаастан атын бырамыысыланнас хайысхаларын көрдөрүүлэрэ 5,7 % үрдээтилэр. Гаас хостооһуна 2,3 төгүл, ньиэп – 12,5 %, кыһыл көмүс – 8,2 % улааттылар”, – диэн иһитиннэрдэ. Даҕатан эттэххэ, миниистир маннык көрдөрүүлэр эрэгийиэн экэниэмикэтин устуоруйатыгар өтөрүнэн ситиһиллибэтэхтэрэ диэн бэлиэтээтэ.
Майя Данилова тыа хаһаайыстыбатын салаата төрдүс сылын өрө эрэ дабайар, харбыалаһар диэтэ. Ол курдук, АПК-ны өйүүр пуонда капитализациятын суотугар Мииринэйгэ, Намҥа, Кэбээйигэ сүөһү турар комплексалара тутуллубуттар. Аммаҕа, Сунтаарга, Хаҥаласка 360-түү сүөһү турар саҥа хотонноро үлэҕэ киирбиттэр.
Саха сирэ инвестиционнай килиимэт национальнай рейтиҥэр бэйэтин миэстэтин бөҕөргөппүт уонна икки позиция өрө тахсыбыт. Ол түмүгэр Уһук Илиҥҥэ ТОП-20 иһигэр киирбит.
Миниистир иһитиннэрбитинэн, өрөспүүбүлүкэ бүддьүөтүгэр 249,8 млрд солк. дохуот киирбит. Ол эбэтэр былырыыҥҥы көрдөрүү 2019 сыллааҕыны 13,5 %-нан куоһарбыт. Бу иһигэр нолуоктан киирэр дохуот 11,9 млрд солк. буолбут, ол эбэтэр 2019 сылы кытта тэҥнээтэххэ, 7,3 %-нан улааппыт. Федеральнай өйөбүл кээмэйэ 120,4 млрд солк буолбут. Ол эбэтэр 2019 сылтан 37,1 %-нан элбэх.
“Атырдьах ыйыттан хамнас үрдээһинэ бэлиэтэнэр. Үһүс кыбаарталтан нэһилиэнньэ дохуота биллэ улаатан саҕалаата. Өскөтүн 1990 сылтан нэһилиэнньэ мэлдьи аҕыйыы турбут эбит буоллаҕына, былырыын төттөрүтүн эбилиннэ. Ол курдук, оҕо төрөөһүнүн ааҕан туран, нэһилиэнньэ 12,7 тыһ. киһинэн эбиллибит. Онон өрөспүүбүлүкэ олохтооҕун ахсаана 984,7 тыһ. киһиэхэ тэҥнэстэ”, – диэн миниистир Майя Данилова иһитиннэрдэ.
-
0
-
0
-
0
-
0
-
0
-
0
