Бастатан туран, гаас уматык сыаната бэнсиинтэн икки төгүл чэпчэки. Иккиһинэн, Аллараа Бэстээххэ убатыллыбыт айылҕа гааһын оҥорор собуот бастакы уочаратын тутуута саҕаланыаҕа. Хайа да өттүнэн көрдөххө, төгүрүччү барыс. Ол эрэн, Саха сиригэр билигин массыына 5%-на эрэ гаас уматыгынан сүүрэрэ биллэр.
Аны туран, массыыналарын гаас уматыкка көһөрүөн баҕалаах дьону субсидиянан өйүүллэр уонна массыына нолуога чэпчэтиллэр. Бу сыалга өрөспүүбүлүкэ бүддьүөтүттэн 24 мөл. солк. көрүллүбүтэ. Үбүлээһин өрөспүүбүлүкэ иһигэр баар гаас уматыкка көһөрөр тус сыаллаах кииннэргэ ыытыллыаҕа. Оттон тустаах кииннэр массыыналарын гаас уматыкка көһөрөр хас биирдии килийиэҥҥэ сөптөөх чэпчэтиилэри олохтуохтара.
Манна даҕатан, СӨ Ил Дархана Айсен Николаев СӨ парламеныгар туһаайан оҥорбут Анал этиитигэр иһитиннэрбитинэн:
- Нам уонна Хаҥалас пилотнай улуустарга тыа хаһаайыстыбатын тиэхиньикэтин гаас уматыкка көһөрүү саҕаланыаҕа. Гаас уматык ырыынагын сайыннарыыны, убатыллыбыт айылҕа гааһын кутан биэрэр инфраструктураны тэрийиини өйүүр дьаһаллары ылынныбыт. Гаас уматыкка көспүт тырааныспарга нолуок ыстаапката 50% чэпчэтилиннэ. Гааһы кутан биэрэр саҥа үлэҕэ киирэр эбийиэк нолуоктан босхолонор буолла. Бу курдук тиэхиньикэни гаас уматыкка көһөрүүнү көҕүлүүр ньымалар салгыы олохтоннохторуна табыллар. Гаас уматыгы кутар эбийиэги тутарга сир учаастагын биэрии уонна докумуонун оҥоруу хаамыыта судургу буоларын ситиһиэх тустаахпыт.
Чахчытыгар гаас сапыраапкатын ситимин Саха сирин оройуоннарынан тэрийии бириэмэ ирдэбилинэн буолар.
Билигин уматык сыанатыттан айан-сырыы, бородуукта барыта ыарахан. Уопсайынан, уматык сыаната хайдах быһаарылларын туһунан этэр буоллахха, бырабыыталыстыба 100 % уматык сыанатын хонтуруоллуур кыаҕа суох, ньиэп хампаанньалара чааһынай урбаан илиитин иһигэр баар буоланнар, сыананы кинилэр олохтууллар.
Дьокуускай үрдүнэн уматык сыанатын ылан көрдөххө, ортотунан: АИ-92 - 57 солк., АИ-95 - 57,80 солк., АИ-98 - 58,50 солк. ДТ- 61,70 солк.
«Саханефтегазсбыт», «Туймаада-ньиэп», «Сибойл» сапыраапкаларын кытта тэҥнээтэххэ, арыый чэпчэки сыаналаах бэнсиини «ЯТЭК» уонна «Экто-ойл» хампаанньалар атыылыллар:
- «ЯТЭК» сапыраапкаларыгар уматык сыаната: А80 -38,1 солк, АИ-95 – 55,5 солк., АИ-92 – 53,7 солк., ДТ – 58,4 солк.
- «Экто-ойл» сапыраапкаларыгар уматык сыаната: А-80 – 38,1 солк., АИ-95 -55,5 солк., АИ-92 – 53,7 солк., ДТ – 58,4 солк.
Оттон гаас уматыга, ортотунан – 24,50 солк. Онон, Саха сирин олохтоохторо бэнсиин эбэтэр гаас уматыга хайата ордугун талаллара кэм-кэрдии көрдөрүөҕэ.
-
0
-
0
-
0
-
0
-
0
-
0
