Оттон быйыл кулун тутар 15 күнүттэн 19 күнүгэр диэри 5 хонуктаах Нерюнгри куоракка уонна Иенгра сэлиэнньэтигэр Арассыыйа бэрэссэдээтэлистибэтин Аартыка Сэбиэтин 2021-2023 сс. былаанын чэрчитинэн норуоттар икки ардыларынааҕы табаһыттар чөмпүйэнээттэрэ ыытыллар.
Аартыка Сэбиэтин улахан дуоһунастаах сирэйдэр кэмитиэттэрин бэрэссэдээтэлэ Николай Корчунов эппитинэн, бу тэрээһин Арассыыйа Хотугу сирин социальнай-экэнэмиичэскэй туруктаах сайдыытын, олохтоох этностар олороллоругар табыгастаах усулуобуйаларын тэрийиигэ сүдү суолталаах:
— Чөмпүйэнээт Хотугу сир төрүт олохтоох аҕыйах ахсааннаах норуоттарын бэрэстэбиитэллэрин икки ардыларыгар ыкса сибээһи бөҕөргөтүүгэ көмөлүүр.
— Бу күннэргэ Сахабыт Сирэ Аартыка сэбиэтин көрсөр — бу устуоруйаҕа сүдү суолталаах бэлиэ тэрээһин. Чөмпүйэнээккэ тас дойдулар ыалдьыттара, федеральнай министиэристибэлэр бэрэстэбиитэллэрэ кыттыыны ылыахтара. Доҕотторбун, биир идэлээхтэрбин уонна биир дойдулаахтарбын көрсөрбүттэн олус үөрэбин. Кэнники сылларга үгүс үлэ ыытылынна, Аартыка сайдыытыгар инники кэскиллээх хардыыларын торумнуохпут. Ыра санаа— Нерюнгри куората улахан тэрээһиннэргэ бэлэмнэнэр. Өрөспүүбүлүкэ бары уһук муннуктарыттан тиийэ табаһыттар кэлиэхтэрэ. Кинилэргэ анаан таба иитиитин төрүт дьарыгар күрэхтэһиилэр тэриллиэхтэрэ. Уһук Илин уокурук төрүт олохтоох табаһыттарын сомоҕолуур,— диэн социальнай ситимнэргэ Ил Түмэн аҕыйах ахсааннаах норуоттар дьыалаларыгар сис кэмитиэтин бэрэссэдээтэлэ Елена Голомарева санаатын үллэстэр.
Чөмпүйэнээт чэрчитинэн эр дьоҥҥо таба көлүүрүнэн 3 км сүүрдүүгэ, 1 км уһуннаах хайыһарынан сүүрүүгэ, аан дойдутааҕы быраабыланан аркааны быраҕыыга, табаны тутууга күрэхтэһиилэр ыытыллаллара былааннанар. Ону таһынан, «Аартыкаҕа сүҥкэн уларыйыы усулуобуйатыгар хотугу дьиэ табатын туруктаахтык сайыннарыы» норуоттар икки ардыларынааҕы кэмпириэнсийэ пленарнай мунньаҕа, СӨ норуот маастара, худуоһунньук-модельер, норуот көстүүмүн устуоруга Л. Будищева «Розовая чайка», «Амазонки Якутии», «Реверанс» кэллиэксиэйэлэрин көрдөрүү, СӨ Тыатын хаһаайыстыбатын министэристибэтэ, «А-Проперти» ХЭО уонна Хотугу сир төрүт олохтоох аҕыйах ахсааннаах норуоттарын төрүт общиналарын икки ардыларыгар бииргэ үлэлээһин туһунан сөбүлэһиигэ илии баттааһын, «Тыгын Дархан» уус-уран киинэ көрдөрүү, «Дьикти Иенгра» этно-туристическай комплекс тутуутун бырайыагын билиһиннэрии, СӨ төрүт олохтоох аҕыйах ахсааннаах норуоттарын судаарыстыбаннай тыйаатыра «Кырыыстаах стойбище» испэктээги көрдөрүү о.д.а. тэрээһиннэр буолуохтара.
-
0
-
0
-
0
-
0
-
0
-
0
