Форуму тэрийээччилэр иһитиннэрбиттэринэн, форумҥа култуура, үөрэхтээһин уонна төрүт тыл, ыччат бэлиитикэтэ, успуорт уонна социальнай өттүнэн үтүө туруктаах буолуу боппуруостарыгар араас хабааннаах кэпсэтии тахсыахтаах. Сарсын, муус устар 6 күнүгэр, “Стратегия устойчивого развития КМНСС и ДВ РФ: опыт, новые вызовы, механизмы решений” диэн форум пленарнай мунньаҕа буолуоҕа. Итини тэҥэ, Арассыыйа хотугу төрүт олохтоохторун Ассоциациятын IX сийиэһэ үлэтин саҕалыаҕа, Ассоциация бэрэсидьиэнэ Григорий Ледков туох үлэ ыытыллыбытын билиһиннэриэҕэ. Сийиэс дэлэгээттэрэ Ассоциация саҥа бэрэсидьиэнин талыахтара уонна анал резюмены ылыныахтара. Саха сириттэн дэлэгээт быһыытынан 20 киһи тиийэн кытта сылдьар.
СӨ хотугу аҕыйах ахсааннаах төрүт норуоттарын Ассоциациятын бастакы вице-бэрэсидьиэнэ Любовь Христофорова Форум үлэтэ киэҥ далааһыннаахтык, интэриэһинэйдик ыытыллан эрэрин уонна Саха сириттэн тиийбит дэлигээссийэ форум бары тэрээһиннэригэр көхтөөхтүк кыттан, тус этиилэрин аһаҕастык этиниэхтэрэ диэн эрэнэрин эттэ. Санатар буоллахха, хотугу төрүт норуоттарга аналлаах тэрээһин Салехардка муус устар 5-7 күннэригэр ыытыллар. Форумҥа барыта хотугу норуоттар төрүт олохтоохторун 300 бэрэстэбиитэлэ кытта сылдьар.
- 0
- 0
- 0
- 0
- 0
- 0