Ньурба уонна Сунтаар улуустарыгар ойуур баһаардарын утары охсуһуу номнуо хаһыс да күнүн ыытыллар. Ил Дархан сорудаҕынан, СӨ Бырабыыталыстыбатын бэрэссэдээтэлин солбуйааччы Дмитрий Садовников Ньурбаҕа балаһыанньаны быһаара тиийдэ.
«Тыаллаах куйаас күннэр тураннар, баһаар уота түргэнник тэнийдэ. Ол эрээри Авиалесоохрана уонна олохтоох нэһилиэнньэ көмөлөрүнэн билигин улахан куттал суоһаабат. Үс күн иһигэр умулларар сорук турар», — диэтэ вице-премьер.
Умуруорууга Хабаровскайтан 50, итиэннэ Приморскай кыраайтан парашютнай-десантнай сулууспа 120 үлэһитэ кэлиэҕэ. Бу туһунан Ойууру кэтээн көрүү уонна харыстааһын департаменын салайааччыта Владимир Иванов иһитиннэрдэ. Бүгүн киэһэ МЧС “БЕ-200” амфибия-сөмөлүөтэ кэлэрэ күүтүллэр.
Билиҥҥитэ чаҕылҕаннаах, этиҥнээх ардахтар буола иликтэр. Онон бу баһаардар барыта киһи дьалаҕай туттуутуттан таҕыстылар. Түөрт буруйдааҕы ирдэһэн буллулар, кинилэргэ холуобунай дьыала тэрилиннэ.
Өрөспүүбүлүкэ үрдүнэн 50 термо-туочука, 20-тэн тахса баһаар баара биллэр. Онтон 13-н умуруордулар.
Баһаардары умуруорууга барыта холбоон 1209 киһи үлэлии сылдьар. (Авиалесоохранаттан -- 257 киһи, «Якутлесресурс» тэрилтэттэн уонна лесничествоттан — 132, МЧС-тан — 30, олохтоох нэһилиэнньэттэн – 790 ) . Барыта 141 тиэхиньикэни туһаналлар, ол иһигэр үөһэттэн уу кутар “Ми-8” бөртөлүөтү.
СӨ Бырабыыталыстыбатын резервнэй пуондатыттан баһаардары умуорууга эбии 50 мөл. солк. көрөр буоллулар.
-
0
-
0
-
0
-
0
-
0
-
0
