Сылын ахсын бу күн итэҕэллээхтэр Айыы Тойон Таҥара үөрэҕинэн сибэтиэй уунан сууналлар, ууну ылаллар уонна эмтээх буоларын ыйан-кэрдэн туран, дьиэлэригэр илдьэн оҕолоругар, аймахтарыгар иһэрдэллэр. Билигин ОРВИ эпидемията куоракка турбутунан, «сибэтиэй уу туһалаах буолуо дуо?», «сибэтиэй уу кырдьык эмтээх дуо?» диэн, Дьокуускайдааҕы оҕо балыыһатын бастакы чэбдигирдэр уонна реабилитациялыыр отделениетын оҕо невролог бырааһыттан Алена Георгиевнаттан ыйыталастым.
— Мин истэрбинэн, билэрбинэн, тохсунньу 19 күнүн түүнүгэр сорох дьон ууну сэрээттииллэр, сибэтиэй ууну дьиэлэригэр баһан илдьэллэр, кыраантан сүүрдэн иһэллэр эбэтэр тустаах миэстэлэргэ күнүгэр сөтүөлүүллэр. Алена Георгиевна, Эн санааҕар Кириһиэнньэ түүнүгэр ылыллыбыт уу эмтээх буолуо дуо?
— Оо, эчи кутталын. Боростуойдук эттэххэ, кыраантан, ойбонтон ылыллыбыт ууну оҕолорго да, улахан да дьоҥҥо иһэрдэр көҥүллэммэт. Кириһиэнньэ түүнүн да, көннөрү да күннэргэ ылыллыбыт ууну хайаан да оргутан баран иһиллиэхтээх.
— Оччоҕо араас учуонайдар, таҥара үөрэхтээх дьоно «сибэтиэй уу эмтээх уонна туһалаах» дииллэрин туох дии саныыгын?
— Мин сибэтиэй ууну иһэри утарбаппын, холобур, ыраастаммыт оргуйбут ууну Кириһиэнньэ күн таҥара дьиэтигэр баран сэрээттиэххэ сөп. Маннык ньыма оҕолорго да, улахан да дьоҥҥо доруобуйаҕа туһалаах буолуо. Эппитим курдук, ханнык баҕарар уу оргутуллуохтаах, ыраастаныллыахтаах, ол кэннэ биирдэ иһиллиэхтээх. Саамай туһалаах — муус уута.
Ыспыраапка
- Тохсунньу 18 күнүттэн 20 күнүгэр диэри — Кириһиэнньэ күнэ. Православнай христианнар итэҕэллэринэн тохсунньу 19 күнүгэр Иордан үрэҕэр Иисус Христоһу Иоанн Предтеча кириэстээбитэ бэлиэтэнэр. Бу күн уратытынан итэҕэллээх киһи икки улахан уунан ыраастаныыта буолар, бастакыта — сочельник күн таҥара дьиэтигэр, иккиһэ — тохсунньу 19 күнүгэр, ыраас халлаан анныгар, күөллэргэ биитэр үрэхтэргэ. Эрдэттэн ойбон үүттэнэн, таҥара итэҕэлэ этэринэн, ханнык баҕарар киһи ууга үстэ умсан ылыахтаах, ону таһынан мэлииппэ ааҕыахтаах. Муустаах ууга сөтүөлүүр киһи дууһатын, этин-сиинин чэбдигирдэр, сыл тухары мунньуллубут кыһалҕаларын, сор быатын ыраастанар.
Араас мистическэй үөрэхтэр этэллэринэн, бу күн Күн, Сир уонна Галактика оройун кытта анал сибээс үөскүүр, атыннык эттэххэ, «энергетическэй ханаал». Бу түгэҥҥэ сир, уу, харамай уонна киһи ыраастанар, эмтэнэр. Ордук күүстээҕинэн киһи уу нөҥүө ыраастаныыта уонна эмтэниитэ буолар.
— Быраас быһыытынан этэргин кытта сөпсөһөбүн, ол гынан баран дьиэ кэргэҥҥин кытта сибэтиэй ууну бэйэҥ иһэҕин дуо?
— Эппитим курдук, мин тус бэйэм таҥара дьиэтигэр баран ылбыт, ыраастаммыт уонна оргутуллубут ууну иһэбин эбэтэр ууну балкоҥҥа сэрээттиибин, ону табаарыстарым да, аймахтарым да билэллэр. Кириһиэнньэ күн дьоммун кытта мин ууну ойбонтон ылбаппын, оргутуллубатах ууну бэйэм даҕаны испэппин, оҕолорбор даҕаны иһэрдибэппин. Хас биирдии киһи доруобуйатын туһугар сэрэхтээх буоларыгар, Кириһиэнньэ да, атын да күн хайа баҕарар түгэҥҥэ ууну ыраастаан, оргутан баран иһэргитигэр сүбэлиибин.
— Алена Георгиевна, ыйытыыларбар хоруйдаабытыҥ иһин махтанабын. Бу үүммүт сылга эһиэхэ уонна бары аймахтаргытыгар доруобуйаны, дьолу-соргуну баҕарабын.
— Махтал. Мин эмиэ бу түгэни мүлчү туппакка, биир идэлээхтэрбин, дьүөгэлэрбин, табаарыстарбын, бука бары аймахтарбын үүммүт Саҥа сылынан эҕэрдэлиибин.
Сүбэлэр
- Сибэтиэй ууну иһэри, суунары таһынан дьиэни эмиэ ыраастыахха сөп. Кириһиэнньэ күн ылыллыбыт сибэтиэй ууну кириэстии хаҥас илиигинэн, дьиэҕин чаһы эргииринэн, тарбаҕын төбөтүнэн ыһыллыахтаах. Киирэр аан таһыттан саҕалаан дьиэ иһигэр араас хосторунан чаһы эргииринэн хаамаҥҥын, киирэр ааҥҥа төннүөхтээххин. Дьиэни сибэтиэй уунан ыраастыыргар хайаан да ааннар уонна бордууһуна аһаҕас туруохтаахтар, маны таһынан маннык мэлииппэ ааҕыллыахтаах: «Окроплением воды сия священныя в бегство да претворится всякое нечистое и бесовское действо». Бу ньыманы нэдиэлэ ахсын туһаныахха сөп. Хас биирдии куһаҕан санаа, этиһии айдааныгар үөскээбит, муннуктарга иҥмит хара дьайдар сүтэллэрэ бэлиэтэнэр.
- Кириһиэнньэ уутугар эбии уу куттахха, күүһүн сүтэрбэт эбит. Итэҕэл быһыытынан, биир хааппыла сибэтиэй уу акыйаан уутун ыраастыан сөбө ыйыллар.
-
2
-
0
-
0
-
0
-
0
-
1
