Уопсастыба

-- Кириһиэнньэ уутун хаһан ылыахха сөбүй?

-- Үгэс быһыытынан, Кириһиэнньэ сибэтиэй уутун литургия кэнниттэн уонна Улуу ууну сибэтии гыныы кэнниттэн ылыллар, ол эбэтэр тохсунньу 18-19 күннэригэр. Ууну сиэркэптэртэн уонна храмнартан ылыахха сөп. Ол эрээри, Кириһиэнньэ күнүгэр уонна чэчиэринньиккэ уу эйгэтэ барыта ыраастаммыт, дьикти күүһүнэн туолбут дэнэр. Бу биирдиилээн үрэхтэргэ, эбэтэр анал эрэ сирдэргэ сыһыана суох диэн сыаналанар.

-- Төһө ууну ылан хаһааныллыахтааҕый?

-- Ол туһунан биир да Сибэтиэй суруйууга ыйыллыбат. Ол эрээри, храмнартан улахан канистранан ууну баһар сүөргү. Дьиҥинэн, биир да лиитэрэ ууну ылыы сөп, тоҕо диэтэххэ, сибэтиилэммит уу күүһэ хас биирдии хаапылаҕа баар буолар.

-- Ууну дьиэҕэ хайдах харайабытый?

-- Бу күннэргэ ылыллыбыт уу буорту буолбат. Холодильник иһигэр харайар табыгаһа суоҕун ааһан, киртитиэн сөп. Онон ууну анал, ураты суолталаах дьиэ муннугар уурар ордук. Дьиэҕитигэр иконалар баар буоллахтарына, ол аттыгар уурар табыгастаах. Оттон оннук анал миэстэ суох түбэлтэтигэр,  ыраас, сырдык сиргэ ууруҥ.

-- Туохха туһанылларый?

-- Итэҕэллээх дьоҥҥо Сибэтиэй уу өр турбат. Ууну араастаан туһаналлар:  иһэллэр, сууналлар, дьиэ муннуктарыгар ыһаллар. Сибэтиэй ууну Таҥара көмөтүгэр, өйөбүлүгэр наадыйар дьон туһанар. Бу манна сыттаҕа дии, Иисуһу кытары алтыһыы, кини сүдү күүһүгэр итэҕэйии уонна сүгүрүйүү.

Мин тус бэйэм Кириһиэнньэҕэ ыраастаммыт ууга ытыктабыллаахтык сыһыаннаһабын. Дьиэбэр 1976 сыллаахха ылыллыбыт Кириһиэнньэ уута турар. Өстүөкүлэ курдук дьэҥкир, ып-ыраас. Бу кини сүдү күүһүн өссө төгүл дакаастыыр диэн сыаналыыбын.

Сибэтиэй уу, суруйааччы Димитрий Херсонский эппитинии, дьон дууһатын, этин-сиинин ырааһырдар. Ол эбэтэр, чахчы итэҕэйэн, уонна мэлииппэни кытары туһаннахха, ханнык баҕарар ыарыыттан көмөлөһүөн сөп. Маны сэргэ,  дьиэни-уоту ыраастыырга көмө буолар.

Оттон ытык кырдьаҕас, иеросхимонах Серафим Вырицкай Кириһиэнньэ уутунан аһы-үөлү ыһыахтыырга, оттон ыарахан ыарыһахтарга хас чаас ахсын биирдии ньуоска ууну иһэргэ сүбэлиирэ.

Хаартыска:  ЯСИА