Тутуу

Ил Түмэнтэн бэрэссэдээтэл бастакы солбуйааччыта Александр Жирков бара сырытта. Кини уонна Ил Дархан Айсен Николаев, СӨ Бырабыыталыстыбатын бэрэссэдээтэлин солбуйааччы Сергей Местников буолан бастаан Суотту саҥа оскуолатын көрдүлэр, кэлэктииби кытта көрүстүлэр. Онтон Бороҕоҥҥо тиийэн, 75 миэстэлээх оҕо саадын уонна В.В. Никифоров-Күлүмнүүр аатынан “Тойон Мүрү” култуура дыбарыаһын үөрүүлээх аһыллыытыгар сырыттылар.

Суоттуга

Суотту 220 миэстэлээх орто оскуолата «Үөрэхтээһин» национальнай бырайыак чэрчитинэн тутуллубут. Бу иннинэ оҕолор түөрт араас дьиэнэн бытанан үөрэммиттэрэ. 1975 сыллаахха тутуллубут оскуола саахалланар туруктаах буолан көтүрүллүбүт.

Икки мэндиэмэннээх, толору хааччыллыылаах таас оскуолаҕа киэҥ-куоҥ үөрэнэр кылаастары сэргэ анал лабораторнай, лингафоннай, мультимедийнай кэбиниэттэр, мастарыскыай, мунньах ыытыллар, эрчиллэр, үҥкүүлүүр саалалар, бибилэтиэкэ, 78 үөрэнээччи батар остолобуойа баар. Тиэргэнигэр футболлуур хонуулаах, сүүрэр анал “дорожкалардаах” уонна спортивнай былаһааккалаах. Оскуолаҕа цифровой уонна гуманитарнай хайысхалаах «Точка роста» киин аһыллыбыта.

Суотту орто оскуолатын 11 кылаас-кэмпилиэгэр 190 оҕо үөрэнэр. Кэнники биэс сылга үөрэнээччилэр Бүтүн Арассыыйатааҕы үгүс тэрээһиҥҥэ ситиһиилээхтик кытталлар, сылын аайы судаарыстыбаннай олимпиадалар эрэгийиэннээҕи түһүмэхтэрин финалистара буолаллар.

Бороҕоҥҥо 

Бороҕоҥҥо саҥа тутуллан олоххо киирбит оҕо саада 883 кв. м. иэннээх. “Демография” национальнай бырайыак чэрчитинэн, “АлмазЭргиэнБаан” АУо кыттыгас көмөтүнэн тутулунна. “Силим” тутуу хампаанньата  генеральнай бэдэрээтчит буолла.

Дьыссаакка бөлөхтөр хосторун сэргэ муусукаҕа уонна гимнастикаҕа уһуйуллар саалалар, психолог, логопед, биэлсэр кэбиниэттэрэ бааллар. Оҕолор дьарыктанар хосторо тупсаҕай миэбэлинэн уонна аныгы үөрэх тэриллэринэн (магниттаах маркер дуосканан, цифровой пианинонан, о.д.а.) хааччыллыбыттар. Эти-хааны эрчийэргэ велотренажер, горкалар, батуттар, кураанах бассейн, о.д.а. спортивнай инбэнтээри ылбыттар.

Күлүмнүүр дыбарыаһа күлүмнүүр

В.В. Никифоров-Күлүмнүүр аатынан «Тойон Мүрү» култуура дыбарыаһа 3800 кв.м. иэннээх, аныгы тэрилинэн-малынан толору хааччыллыбыт, 270 миэстэлээх көрөөччү саалалаах, эрэпэтииссийэлэнэр, дьарыктанар хостордоох, ааҕар саалалаах, бибилэтиэкэлээх.

Уус Алдан улууһун баһылыга Алексей Федотов бэлиэтээбитин курдук, «Тойон Мүрү» култуура дыбарыаһа, 2018 сылтан аахтахха, Уус Алдаҥҥа отутус социальнай эбийиэк буолар. 2020 с. «АЛРОСА» хампаанньата СӨ Үүнэр көлүөнэлэрин пуондатыгар киллэрэр дивиденнэрин үбүгэр тутуллан саҕаламмыт.

Саха бастакы көлүөнэ интэлигиэнсийэтин лиидэрэ В.В. Никифоров-Күлүмнүүр аатын сүгэр култуура дыбарыаһа Арассыыйа норуоттарын үйэлээх баайдарын сылыгар аһыллыбыта ураты бэлиэ суолталанна.

Спартакиадаҕа бэлэмнэнии

Бу сайын от ыйын 4-9 күннэригэр Уус Алдан улууһугар Саха Сирин норуоттарын VIII спортивнай оонньуулара буолар. Онно 2000-тан тахса спортсмен кыттара күүтүллэр. Бырагыраамаҕа 16 спорт көрүҥэ киирбит:  аэробика, баскетбол, волейбол, мини-футбол, чэпчэки атлетика, остуол тенниһэ, спортивнай тустуу, дуобат, саахымат, ох саанан ытыы, гиирэ, спортинг, бокс. Күрэхтэһиилэр Бороҕоҥҥо, Мындаабаҕа, Сыырдаахха уонна Чараҥҥа ыытыллыахтара.

Оонньууларынан сибээстээн Уус Алдаҥҥа спорт 4 эбийиэгэ тутулла турар: Бороҕоҥҥо 1000 миэстэлээх стадион, Чараҥҥа 1124 миэстэлээх, трибуналаах ипподром, Мындаабаҕа 32 миэстэлээх универсальнай комплекс уонна олорор уопсай дьиэ. Сыл бүтүөр диэри улуус киинигэр элбэх хайысхалаах чэбдигирдэр-спортивнай комплекс тутуллара былааннанар.

Бороҕоҥҥо үс сүрүн уулусса – Юннаттар уонна Ленин аатынан -- аспаалланыахтара, Стрекаловскай уулуссата бетоннаныаҕа.

Бу курдук Уус Алдан улууһугар саҥа дьиэлэр дьэндэйэллэр, тутуу тэтимнээхтик барар

Валентина Бочонина.