Күн бүгүн испииһэккэ турар дьон 80% көһөрбүттэр, үп тиийбэккэ бырагыраама кэмигэр бүппэккэ хаалла, ол иһин бырыгырааманы 2028 с. балаҕан ыйыгар диэри уһатарга этии киирдэ. 1 118 кв.м. иэннээх хаарбах дьиэттэн өссө 60 000 киһи көһүөхтээх. Ону олоххо киллэрэргэ 119,8 млрд. солк. ирдэнэр., федеральнай уонна өрөспүүбүлүкэ бүддьүөтэ кыттыгас үбүлээбитин кэнниттэн 24,9 млрд. солк. тиийбэт.
Маннык дэписиит үөскээбит сүрүн төрүөтэ лимиити ааҕалларыгар 2019 с. биир кв.м. сыанатын 73,07 тыһ.солк. аахпыттар. Оттон билигин Дьокуускайга биир кв.м. сыаната 153 000 солк.
"Ол иһин 2017 с. кэнниттэн хаарбах дьиэ испииһэгэр киирбит дьону көһөртүүр бырагыраама үбүлээһинин 25 млрд. солк. бу иннинээҕи бырагырааманы бүтэрэргэ ыытарга сокуон барылын Ил Түмэн пленарнай мунньаҕар ылынныбыт. 13 эрэгийиэҥҥэ эмиэ үбүлээһин тиийбэккэ маннык балаһыанньа үөскээтэ. Судаарыстыбаннай Дуумаҕа бу көҕүлээһини өйүөхтэрэ диэн эрэнэбит", - диэн Ил Түмэн тутууга, дьиэҕэ-уокка, хомунаалынай хаһаайыстыбаҕа уонна энергетикаҕа сис кэмитиэтин бэрэссэдээтэлэ Александр Корякин эттэ.
Өскөтүн үбүлээһин кэмигэр көрүлүннэҕинэ, быйыл бүтүөхтээх эрээри, бүппэккэ соһулла сылдьар бырагыраама түмүктэнэн, эмэҕирбит мас дьиэ көтүрүллэн, дьон олорор услуобуйатын тупсарыа этэ. Оттон хомунаалынай хаһаайыстыбаҕа үп тиийбэтин бүддьүөт иккис ааҕыытыгар эбэн биэриэхтээхтэр. Хааһынаҕа үп-харчы кырыымчык кэмигэр бу сытыы боппуруоһу быһаарарга Ил Түмэн тутууга, дьиэҕэ-уокка, хомунаалынай хаһаайыстыбаҕа уонна энергетикаҕа сис кэмитиэтэ парламентскай истиини, үгүс сүбэ мунньахтары тэрийэн ыытта.
Эрэдээксийэ хаартыската.
-
0
-
0
-
0
-
0
-
0
-
0
