Ханнык баҕар үлэҕэ санаалара кыайбат дьону хамсаппаккын, оннук дьон олох устун устан эрэ иһэллэр.
Тыа сиригэр олорор эдэрчи, саас ортолоох дьон ынах, сылгы ииттэн бэйэлэрин хааччынар, ордорун атыылаан дохуот оҥостор толкуйга киирдэхтэринэ, тыа сиригэр үлэлиир, олорор көдьүүстэн атыны аҕалыа суох этэ.
Ѳрѳспүүбүлүкэ Ил Дархана Айсен Сергеевич Николаев дойдуга буола турар уустук кэмҥэ дьон-сэргэ түмсэн, бары уустуктары туоруурга үлэҕэ-хамнаска ылсан үлэлиэ, үптээх-харчылаах буоларга дьулуһуо диэн 2023 сылы Үлэ сылынан биллэрдэ .
Тыа сиригэр ынах сүөһү көҕүрээһинин биир сүрүн биричиинэтинэн дьон сааһыран доруобуйатын туругунан ынах сүөһүтүн ахсаанын кыччатыыта, бу дьарыгын төрүт даҕаны тохтотуута буолар .
Нэһилиэктэргэ тыа хаһаайыстыбатын кооперативтарын тэрийэн, кэтэх ыаллар ынах сүөһүлэрин онно ылан көрдөхпүтүнэ эрэ өбүгэбит саҕаттан төрүт дьарыкпытын сүтэриэ суохпутун сөп.
Үѳhээ Бүлүү улууhун Балаҕаннаах нэһилиэгэр Кардашевскай Петр Владимирович бааhынай-фермерскэй хаhаайыстыбата хаһыс да сылын ыаллар ынах сүөһүлэрин ылан бэйэтин хотонугар көрөр. Петр Владимирович үтүөтүнэн эрэ киниэхэ сүѳhүлэрин итэҕэйэн туттарбыт дьон кэтэх хаhаайыстыбаларын эспэккэ олороллор.
Петр Владимировичтыын кооперативтары тэрийии боппуруоһугар кэпсэтэ сылдьыбыппыт, кини сөбүлэһэр, үлэни тэрийиэм этэ диэн эрэллээхтик этэр .
Бу маннык эдэр патриот дьону тыа хаhаайыстыбатын министиэристибэтэ, улуус, нэһилиэк салалталара өйдөөтөхпүтүнэ,өйөөтөхпүтүнэ кини курдуктары утумнааччы , батыһааччы элбиэ этэ .
Кооператив нөҥүө хотон тутарга ТХМ куонкуруhун аастахха, 10 мөлүйүөн солкуобай көрүллэр .
Маны таһынан "Кардашевскай П.В." БФХ тыа хаhаайыстыбатын министиэристибэтин "Дьиэ кэргэн фермерэ" диэн куонкуруhугар киирсиэн сөп, бу сыалга анаан ТХМ 13 мөлүйүөн солкуобайы көрөр .
Нэһилиэк кооперативыгар анаан бааһына сирдэри оҥотторорго, күрүөлээһиҥҥэ, күөх маассаны, элбэх сыллаах оту ыһарга үбүлээһинин быһаарарбыт буоллар кооператив кэскилэ улахан буолуо этэ.
Кооператив тэрийдэхпитинэ, нэһилиэк сылгылаах дьоно биэ төбөтүгэр көрүллэр 5 тыһыынча солкуобайдаах субсидияны ылар кыахтаналлар. Ол эрэн боппуруос биэ төбөтүгэр субсидия эрэ ылааһын эрэ буолбатах, бу дьон сир оҥостуутугар, күрүөлээһиҥҥэ кыттыһан үлэлээһин. Ол иһин нэһилиэккэ баар бааһыналар, сирдэр, мэччирэҥнэр нэһилиэк дьонун-сэргэтин туһугар үлэлиэхтээхтэр.
Тыа хаһаайыстыбатын министиэристибэтэ эдэр фермердэри тэҥэ нэһилиэк кооперативтара тэриллиилэрин күүскэ өйүөхтээх. Ол инниттэн нэһилиэктэр туһаныллыбакка сытар бааһыналарын чөлүгэр түһэриигэ , күөх маассаны , элбэх сыллаах оттору ыһыыга, ону таһынан дулҕа талах былдьаан оһон эрэр сирдэри ыраастааһынҥа үбүлээһини көрүөн наада.
Бааһыналар нолуоктара үрдүгүнэн дьоннор бааһына сирин оҥостору ыарырҕаталлар. Сир боппуруоһа, Арассыыйа Сирин кодексатыгар быһаарылларынан, Ил Түмэн олохтоох усулуобуйаҕа сөп түбэһиннэрэн оҥорорго үлэлиэн сөбө буолуо, бааһына нолуогун чэпчэтиигэ.
Түмүкпэр, тыа сиригэр кооперативтары тэрийэн өбүгэ саҕаттан төрүт дьарыкпытын чөллөөх хаалларыы, нэһилиэнньэни аһынан-үөлүнэн хаччыйыы сүрүн сыалбыт - сорукпут, инники кэскилбит дии саныыбыт.
-
2
-
1
-
0
-
0
-
0
-
0
