«Сахабэчээт» медиахампаанньа «Далбар Хотун» сурунаала иилээн-саҕалаан ыытар бу куонкуруһугар тыа хаһаайыстыбатыгар үлэлиир дьахталлар көхтөөхтүк кытталлар. Ол курдук, Тааттаттан бааһынай хаһаайыстыба баһылыга Екатерина Винокурова (2013), Амматтан көтөрү уонна мүөттээх ыҥырыаны иитэр Саргылаана Рожина (2024) куонкурус кыайыылаахтарынан буолбуттара, атыттар анал ааттарынан бэлиэтэммиттэрэ.
Быйыл 15-с төгүлүн тэриллибит куонкурус кулун тутар 6 күнүгэр ыытыллыбыта. Барыта сэттэ кэрэ куо күрэхтэспититтэн, Хаҥалас улууһуттан кыттыбыт Светлана Васильева «Хоһуун хотун» аатынан бэлиэтэммитэ. Кини «“Бөртө” сылгы собуота» хааччахтаммыт эппиэтинэстээх тэрилтэҕэ үлэлиир. Сүрүн дохуот үүттэн эрэ киирэр буолан, пиэрмэҕэ хас биирдии ынах ыанар кэмин уһатар, үүтү сылы эргиччи ылар соруктаах үлэлииллэр. Инньэ гынан, ынахтары алтынньы-сэтинньи ыйдартан саҕалаан, от ыйа саҕаланыар диэри төрөтөллөр, кытарааһын суох буоларыгар кыһаналлар. Дьэ ону хааччыйар икки техник-осеменатортан биирдэстэрэ Светлана Васильева буолар. «Далбар Хотун» өрөспүүбүлүкэтээҕи куонкуруска хайдах кыттыбытын туһунан маннык кэпсиир:
– Урукку өттүгэр нэһилиэк, улуус таһымнаах тэрээһиннэргэ син кыттар этим, ол курдук, 2018 сыллаахха «Сайылык хотуна», 2023 сыллаахха «Сыл ийэтэ» күрэхтэһиилэргэ кыттан, биһирэбил ааттарга тиксэн турабын. Оттон «Далбар Хотуҥҥа» кыттарбар тэрилтэм салалтата, чуолаан биригэдьиир Ульяна Семенова сүбэлээбитэ. Тэрийээччилэр сүрдээх үчүгэйдик көрсөн, араас идэлээх исписэлиистэри ыҥыран аҕалан, дьарыктаабыттара, бэлэмнээбиттэрэ, быһата, элбэххэ үөрэппиттэрэ. Араас улуустартан түмсүбүт күрэстэһээччилэр бодоруһан, бары дьүөгэлии буолбуппут. Куонкуруска Улахан Аантан бииргэ үлэлиир дьүөгэлэрим кэлэн, «ыалдьыбыттара». Түмүккэ кыайыылааҕынан Уус Алдан улууһуттан Саина Григорьева буолбута, атыттар араас номинациялара тиксибиппит. Оттон үлэм туһунан кэпсээтэхпинэ, «Бөртөҕө» осеменаторынан 2006 сылтан үлэлиибин. Күн бүгүн хаһаайыстыба 1 000 сылгыны таһынан 800 ынах сүөһүнү, ол иһигэр 400 ыанар ынаҕы кыстатан турар. Билигин 90-ча ынах төрөөн, күҥҥэ биир туонна үүт ыанар. Хаһаайыстыба иһинэн тэриллибит кэпэрэтиип эти астыыр сыахтаах, инньэ гынан, уотууга анаан саҥа төрөөбүт 20-чэ оҕус ньирэйи атыылаһаммыт, 110 ньирэйдээхпит. Осеменатордар иккиэбит, билиҥҥи туругунан, 50-ча ынаҕы сиэмэлээтибит.
-
2
-
0
-
0
-
0
-
0
-
0
