Иван Михайлович Сэбиэскэй Аармыйаҕа сулууспалаан кэлэн баран, Исиидэр Бараахап аатынан сопхуоска суоппарынан үлэтин саҕалаабыта. Онтон Владивосток куоракка профсоюзтар үрдүк үөрэхтэригэр экономист идэтин бүтэрэн, Исидор Барахов аатынан сопхуос Тамалакааннааҕы отделениетыгар управляющайынан ситиһиилээхтик үлэлээбитэ.
1985 сыллаахха ССКП райкомун үлэ каадырдарын бөҕөргөтөр бэлиитикэтин рекомендациятынан Исидор Барахов аатынан сопхуоска профсоюзнай тэрилтэ салайааччытынан быыбардаммыта, сопхуос дириэктэринэн Соргоев Константин Егорович, партком сэкирэтээринэн Иванова Александра Николаевна үлэлииллэр этэ .
Исидор Барахов аатынан сопхуос ити кэмнэргэ үүт ыаһыныгар , эт туттарыытыгар , бурдугу үүннэриигэ оройуоңңа бастыҥ көрдөрүүлээх этэ .
Иван Михайлович 1988 сыллаахха Харбалаах отделениетыгар управляющайынан ананан үлэлээбитэ .
Сопхуос дириэктэринэн Львов Платон Николаевич , партком сэкирэтээринэн Корякин Николай Павлович үлэлээбиттэрэ . 1992 сыллаахха Исидор Барахов сопхуос дириэктэринэн Тойтонов Аркадий Николаевич ананан үлэлээбитэ, ити кэмҥэ Иван Михайлович сопхуос профсоюһун бэрэссэдээтэлинэн үлэлээбитэ.
Дойду үрдүнэн сопхуостар ыһыллыбыттарыгар Тамалакаан отделениетын базатыгар Тамалакаан коллективнай тэрилтэтин тэрийэн, онно салайааччынан таһаарыылаахтык үлэлээбитэ . Ол кэмңэ 1996 сыллаахтан кини улууска ат сүүрдүүтүн көҕүлээччилэриттэн биир бастакыларынан буолбута. Ол курдук, Мэҥэ Хаҥалас улууһун “Тумул” коллективнай хаһаайыстыбаттан (салайааччы Десяткина Таисия Васильевна) түөрт сүүрүүк атыыры уонна биир биэни атыылаһан аҕалан, эрчийэн, сүүрдэн, Бүлүү бөлөх улуустарыгар Үөһээ Бүлүү Тамалакаанын сүүрүк аттара хас да тѳгүл бастаталаан сылдьыбыттара. “Боксер”, “Добрай”, “Эрэл”, “Күөрэгэй” диэн күүстээх сүүрүктэр Үөһээ Бүлүү оройуонун ат сүүрдүүтүгэр элбэхтик ааттаппыттара. Биир түгэни ахтан аастахха, Ньурбаҕа ыытыллыбыт Баһылай Манчаары спартакиадатыгар эрэллээхтик бастаабыттарын атын улуустар үрдүк хааннаах сүүрүктэр диэн туорайдаһан, бириискэ киллэрбэтэхтэрэ, кыайыылаахтар быһыытынан аахпатахтара хомолтолоох этэ.
Улууска ат сүүрдүүтүн тэрийээччинэн уһун сылларга улуус тыатын хаһаайыстыбатын профсоюһун бэрэссэдээтэлэ Иннокентий Константинович Сидоров этэ. Кинилэр Иван Михайловичтыын улууска ат сүүрдүүтүн сүрүннээн, салайан ыытар этилэр, ол кэмнэргэ ат сүүрдүүтүн комментатор Струкин Николай Алексеевич иилээн-саҕалаан, дьон-сэргэ астынар гына сэргэхтик кэпсээн-ипсээн ыытара. Үөһээ Бүлүү улууһугар ат сүүрдүүтүн сайдыытыгар үтүөлээх нэһилиэктэр Нам, Балаҕаннаах, Ороһу, Дүллүкү сүрүннээн элбэх сылларга бу саха аймах таптыыр дьарыгын тэрийэн ыыппыттара .
Иван Михайлович пенсияҕа тахсан баран, 1999 сыллаахха “Барча” бааһынай хаһаайыстыбатын тэринэригэр 17 сылгылааҕа, ону таһынан Ньурба оройуонуттан үчүгэй үүттээх боруода 15 тыһы туҥуйдары атыылаһан, хас да сыл устата бэйэтэ ыан, үүт туттара сылдьыбыта. Онтун 35 төбөҕө тиэрдибитэ, үлэлээбит сылларыгар хас биирдии ынаҕыттан 2000-тан тахса тонна үүтү ыан, үүт собуотугар туттарар этэ. Ити үлэлии сырыттаҕына, улуус тыатын хаһаайыстыбатын управлениетын рекомендациятынан тыа хаһаайыстыбатын миниистирэ Борисов Егор Афанасьевич Үөһээ Бүлүү Сельхозтехникатын дириэктэринэн анаан үлэлэппитэ. Ол кэнниттэн Үөһээ Бүлүү ас-үѳл кэмбинээтин дириэктэрин солбуйааччытынан үлэлээбитэ.
2011 сыллаахха хаһаайыстыбатын уолугар Барчахов Семен Ивановичка туттаран, иккиэн тэҥҥэ хаһаайыстыбаларын сайыннарыыга үлэлииллэр. Билиҥҥи туругунан 100-чэкэ сылгылаахтар, ол иһигэр 60-тан тахса биэлээх, сүрүннээн “Силээн” сылгы базатыгар көрөллөр. 100-тэн тахса гектар оттуур сирдээхтэр, 50 гектар бааһыналаахтар, өссө 50 гектары дьонтон арендалаһан күөх маассаны ыһаллар. 2022 сылга 450 тонна сиилэһи бэлэмнээн, “Булгунньахтаах” бааһынай хаһаайыстыбатыгар Семенова Анна Трофимовнаҕа атыылаатылар, маны таһынан 100 тонна оту оттоон, эмиэ ити хаһаайыстыбаҕа биэрдилэр. “Кур От” диэн быраҕылла сытар сири сөргүтэн, оҥорон, 64 гектарга элбэх сыллаах оту ыспыттара үһүс сыла буолла, быйыл ситэн-хотон, элбэх үүнүүнү ылыахпыт диэн эрэллэрэ улахан.
2022 сыллаахха Россия бааһынай хаһаайыстыбаларын уонна кооперативтарын “АККОР” ассоциацияларын президенэ, Россия Государственнай Думатын депутата, аграрнай кэмитиэтин солбуйааччы бэрэссэдээтэлэ Плотников Владимир Николаевич Саха Сирин бааһынайдар уонна кооперативтарын ассоциациятын тэриллибитэ 30 сыллаах үбүлүөйдээх мунньаҕар кэлэн кыттыыны ылбыта. Киэҥ ыҥырыылаах мунньахха Саха Сирин бааһынай хаһаайыстыбаларын уонна кооперативтарын инники сайдыытын туһунан элбэх кэпсэтиилэр, туруорсуулар буолбуттара, Госдума депутата Плотников В.Н. Саха Сирин бааһынай хаһаайыстыбаларын уонна кооперативтарын үлэлэрин биһирээн, ассоциация бэрэссэдээтэлэ Артемьев Александр Еремеевиһы кытта үлэ-хамнас тэрээһинигэр күүскэ үлэлэһиэх, өйүөх буолан эрэннэрбитэ. Бу улахан тэрээһиҥҥэ “Барча” бааһынай хаһаайыстыбатын баһылыга, СѲ тыатын хаһаайыстыбатын туйгуна Семен Иванович, Иван Михайлович Барчаховтар кыттыыны ылбыттара, уопут атастаһыы бэрээдэгинэн биир идэлээхтэрин кытта ирэ-хоро кэпсэтэн, санаа атастаһан, алтыһан ааспыттара.
-
0
-
0
-
0
-
0
-
0
-
0
