Бэртээхэй тутууну фермер 2020 сыллаахха 2,9 мөл. солк. суумалаах “Агростартап” гранын сүүйэн туттар кыахтаммыт. Бу үпкэ фермер көтөр иитэр ферма, вольер туппут, дьоҕус тыраахтар, тоҥорор оборудование атыыласпыт. Ферма тутуутун 2022 сыл ахсынньытыгар түмүктээбит.
Тимофей 2020 сыллаахха сайыҥҥы көтөрү иитэр ферма тутуутунан үлэтин саҕалаабыт. Оттон 2021 сыллаахха “Уһук Илиҥҥи гектар” бырагырааммаҕа киирсэн, сылгы иитэр анал сирдэммит. Үлэһиттэргэ анаан дьиэ туппут, “Туймаада” ФАПК-тан иэс ылан сэндвич панелларынан субан сүөһүгэ хотон, олбуор мэндэппит.
2022 сыллаахха Үөһээ Дьааҥы боруодалаах 23 төбө сылгыны, 7 субан сүөһүнү, 5 козаны атыылаһан хаһаайыстыбатын хаҥаппыт. Тигээйи дьиэ кэргэнин иитэри саҕалаабыт.
Итиннэ гынан, ааспыт сыл бүтүүтэ хаһаайыстыбатыгар 65 улааппыт хаастаах, 200 төбө сымыыттыыр кууруссалаах, 80 перепелкалаах, 15 кустаах. Нэһилиэнньэ хамаҕатык бородууксуйаны, көтөрдөрү атыылаһар. Уопсайа 898 төбө көтөрү иитэ ылбыттар, ол иһигэр хаастары, кустары, индюктары, перепелкалары, сымыыттыыр кууруссалараы. Билиҥҥитэ инкубаторга 1180 куурусса уонна 300 перепелка сымыыттара тураллар.
Сыллата Амма улууһун тыа хаһаайыстыбаларын атыы-эргиэн дьаарбаҥкатыгар ситиһиилээхтик кыттар. 2022 сылга Өрөспүүбүлүкэтээҕи агробырамыысыланнай быыстапка-дьаарбаҥкаҕа ситиһиилээхтик кыттыбыт.
Манна даҕатан эттэххэ, “Агростартап” грана “Орто уонна аччыгый урбаанньыттар акселерациялара” эрэгийиэннээҕи бырайыак чэрчитинэн бэриллэр. СӨ тыатын хаһаайыстыбатын сайтыгар киирэн, усулуобуйаны билсиэххэ сөп. Саҥа саҕаланан эрэр көдьүүстээх бырайыагы көмүскээбит фермер сүүйэр кыахтаах.
-
1
-
0
-
0
-
0
-
0
-
1
