Дьокутааттары кытта Амма улууһун баһылыга Николай Архипов, улуус мунньаҕын бэрэссэдээтэлэ Софья Александрова уонна улуустааҕы тыа хаһаайыстыбатын управлениетын салайааччыта Ион Кононов сылдьыстылар. Маҥнай Абаҕаттан саҕалаатылар. Манна “Тыа сирин кэлимник сайыннарыы” бырагырааманан тыа хаһаайыстыбатын үлэһиттэригэр анаан биир сиргэ чөкө хас да кэтэх дьиэ тутуллубута. Олохтоохтор бырайыак тиһэҕэр тириэрдиллэн, бу түөлбэ дьиэлэрин биир ититэр ситиминэн хааччыйыахтаах хочуолунай тутулларын туруорустулар.
Ыалдьыттар “Абаҕа” тыа хаһаайыстыбатын производственнай кэпэрэтиибиттэн салгыы “Бөтүҥ” ТХПК-гэр тиийбиттэригэр хаһаайыстыба салайааччыта Дмитрий Левин үлэлэрин-хамнастарын билиһиннэрдэ, кэпэрэтиип базатын, хотонун көрдөрдө. Дьокутааттар хаһаайыстыба үлэһиттэрин кытта көрсөн кэпсэттилэр. Чапчылҕаҥҥа баар улуус астыыр-үөллүүр улахан кэпэрэтиибин быһа ааспатылар. Тэрилтэ салайааччыта Айыы Сиэн Черноградскай кыһыннары үүт тутан, бородууксуйа астыылларын билиһиннэрдэ.
Ити кэнниттэн Ил Түмэн дьокутааттара тыа хаһаайыстыбатын тэрилтэлэрин салайааччыларын, исписэлиистэрин кытта улуус дьаһалтатыгар баһылык Н.А.Архиповка сүбэ мунньахха сырыттылар. Элбэх киһи кэпсэтиигэ ВКС нөҥүө холбонон кыттыста. Тыа хаһаайыстыбатын министиэристибэтиттэн миниистири солбуйааччы Василий Афанасьев сибээскэ тахсан, аграрниктар мунаарар ыйытыыларыгар хоруйдаата. Амма сүөһүлээх хаһаайыстыбалара, бааһынайдара уонна ыаллар, сүрүннээн, үүт туттаран харчылаһаллар. Ол иһин саҥа механизмҥа мунаараллара-мунаахсыйаллара элбэх.
Кэпсэтии түмүгэр Ил Түмэн тыа сиригэр уонна аграрнай бэлиитикэҕэ сис кэмитиэтэ аны саас муус устар саҥатыгар Аммаҕа сир үлэтин кыһалҕалаах боппуруостарын сүнньүнэн көһө сылдьар мунньаҕы тэрийэн ыытыах буолла.
-
0
-
0
-
0
-
0
-
0
-
0
