СӨ Тыа хаһаайыстыбатын министиэристибэтэ 2021 с. кулун тутар 4 күнүгэр таһаарбыт 144-с №-дээх «О мерах по подготовке и проведению весенне-полевых, кормозаготовительных работ в 2021 году» бирикээһинэн, быйыл 457 553 туонна оту, 26 867 туонна сиилэһи, 14 766 туонна сенаһы бэлэмниэхтээх этилэрэ.
Ол эрээри айылҕаны соруйбаккын, хайдах күнү-дьылы бэлэхтиирин бэйэтэ эрэ билэн эрдэҕэ. Онон билигин барыллаан суоттааһынынан, муҥутаан 364,5 тыһ. туоннаны оттуур, ол эбэтэр былаан 79,7 бырыһыанын эрэ толорор туруктаахпыт.
Чэ, холобура, от ыйын 26 күнүнээҕи дааннайынан улуустар төһө оту бэлэмнээбиттэрин табылыыссаттан билсиэҕиҥ.
Көрөргүт курдук, күн бүгүн былааннарын 20% толорбут биир да улуус суох. Сорохтор букатын да мөлтөх көрдөрүүлээхтэр. Итинник тэтиминэн Томпо 41%, Уус Алдан 46%, Өймөкөөн 52%, Ньурба 62%, Өлүөхүмэ 64%, Сунтаар 66%, Чурапчы 73%, Хаҥалас 78%, Нам 84%, Амма 85%, Мэҥэ Хаҥалас 86% былааннарын толорор кыахтаахтар диэн сабаҕалыыллар.
Аны туран, от үүммэтэҕин ааһан, быйыл баһаарбыт дэлэйэ сүр. Сунтаар, Ньурба, Томпо, Мэҥэ Хаҥалас, Нам, Кэбээйи оройуоннарыгар барыта холбоон 464 туонна былырыыҥҥы хаһаас отторун, 730 га оттуохтаах ходуһаларын, 3 тыһ. га мэччирэҥ сирдэрин уокка былдьаттылар.
Онон кэккэ улуустарга нэһилиэнньэлээх пуунтан 60 км тэйиччи сытар ходуһаларга мобильнай биригээдэлэри тэрийэн эрэллэр. Ити биригээдэлэр түһээннэрэ – өрөспүүбүлүкэ үрдүнэн 33 627 туонна оту бэлэмниэхтээхтэр. Бу сыалга өрөспүүбүлүкэ 2021 сыллаах бүддьүөтүн торумнуулларыгар 34 мөл. солк. суумалаах харчыны анаан тыырбыттара.
Билиҥҥитэ Саха сирин ходуһаларыгар 7 187 биригээдэ (ол иһигэр звено, кэтэх ыал) оттуу сылдьар. Итинтэн 1596-та -- механизированнай, 3977-тэ – механизированнай аҥаардаах, 118-һа -- атынан, 1485-һэ -- илиинэн. Онно барыта 24 654 киһи үлэлиир, 9891 тыраахтар сүүрэр.
Тоҕус ыйдаах тымныылаах, уһун кыстыктаах Сахабыт сиригэр быһыллыбыт былааны толорбот диэн көннөрү көрдөрүү эрэ буолбатах. Сүөһү төбөтүн ахсаана аччыырыгар дьайар сыыппаралар. Ол иһин СӨ Тыа хаһаайыстыбатын министиэристибэтэ өрөспүүбүлүкэ таһыттан эбии от атыылаһарга быһаарынна. Амур уонна Магадан уобаластарын, Забайкальскай кыраайы кытта кэпсэтии ыыта сылдьар. Ол курдук, амурдар 4 оройуоннарын анаатылар: Мазановскай, Зейскэй, Шимановскай, Сковородинскай. Балартан от тиэйэн аҕалыахпыт. Чурапчы, Уус Алдан, Өлүөхүмэ, Томпо улуустарын дэлэгээссийэлэрэ Амурскай уобаласка бу боппуруоһунан быһаарса, дуогабардаһа бараары сылдьаллар. Өймөкөөннөр чугастыы Магадантан 2000, томполор 250 туонна оту ыларга быһаарыннылар.
-
0
-
0
-
0
-
0
-
0
-
0
