Экономика

Сахабыт Сиригэр дьиэҕэ-уокка  сылааһы биэрии былаанынан барар иһэр. Энэргиэтикэ эбийиэктэрин уопсай бэлэмэ -- 86%, олох-дьаһах хомунаалынай эбийиэктэр комплекстара - 94%. Оттук сезона  35  оройуоҥҥа болдьоммут кэмигэр саҕаланна. Навигациянан оттугу, уматыгы (чоҕу, ньиэби) тиэйии салҕанар: былаантан 80 %-на тустаах улуустарга тиэрдилиннэ. Алтынньыга барыта миэстэтигэр баар буолара сабаҕаланар.

Маны тэҥэ миниистир түргэнник быһаарыллыахтаах  боппуруостары эмиэ таарыйда. Холобура, Өлүөхүмэҕэ оттук сезона хойутаабытын туһунан кэпсэтии буолла. Оройуон салалтата бигэргэтэринэн, сылааһы биэрии бэнидиэнньиктэн саҕаланыахтаах.

Мунньахха миниистир Уһук Илин географическай балаһыанньатынан уустуктардааҕын, улахан сири тайаан сытарын, маны тэҥэ уопсай ситимтэн хас даҕаны туспа сытар энергетическэй систиэмэлээҕин бэлиэтээтэ.  Онон куттала суох үлэ барарыгар үгүс ресурс уонна энэргиэтикэ инфраструктуратын сайыннарыы ирдэнэрин туһаайда. “Оттугунан кэмигэр хааччыллыы уонна ону сылааһы хааччыйыыга сөптөөхтүк туһаныы -- энэргиэтикэ эбийиэктэрэ тохтоло суох үлэлииллэригэр сүрүн усулуобуйа”, -- диэн тоһоҕолоон эттэ.

 Онон хоту таһаҕас тиэйиитигэр улахан болҕомто ууруллара оруннаах. Маныаха оттугу тиэрдиигэ хантараактар толору туолалларын ирдиир тоҕоостооҕун миниистир чопчулаата.

Николай Шульгинов 2022 сыл сайына былырыыҥҥыга тэҥнээтэххэ, уот ситимигэр баһаарынан уонна халаан уутунан улахан эмсэҕэлээһини таһаарбатаҕын ыйда.

Кини бэлиэтииринэн, уокурук энэргиэтиктэрэ түһүмэҕинэн  үлэни күүһүрдэллэр. Ол курдук, «Россети» тэрилтэ Илиҥҥи тимир суол полигонун уотунан хааччыйар, Чукотка автономнай уокуругун электроэнергетиката сайдар – 2020 сыл ыам ыйыгар атомынан үлэлиир 70 МВт кыамталаах электростанция үлэҕэ киирбит. Билибино куоракка 25 МВт кыамталаах энергокиин тутуутун бырайыага оҥоһуллар, Певек – Билибино хайысханан 490 км усталаах, 110 кВт кыамталаах уот лииньийэтэ тутуллуохтаах. Мантан да атын үлэлэр ыытыллаллар.

Саха Сиригэр энэргиэтикэ икки улахан суолталаах эбийиэгэ үлэҕэ киирдэ. РФ миниистирэ Николай Шульгинов подстанциялар үлэҕэ киирэр үөрүүлээх тэрээһиннэригэр кытынна.  Ол курдук,  220 кВ кыамталаах «КС-1» уонна  220 кВ «Налдинская» үөрүүлээх быһыыга-майгыга арылыннылар. Бэлиэ түгэҥҥэ Ил Дархан Айсен Николаев, РФ энэргиэтикэтин миниистирин солбуйааччы Евгений Грабчак, «Россети» ПАО генеральнай дириэктэрэ Андрей Рюмин сырыттылар.

Энэргиэтикэ миниистирэ бэлиэтииринэн, бу икки подстанция үлэҕэ киирэригэр эрэгийиэн уонна федеральнай структуралар өттүлэриттэн улахан үлэ барбыт.

 «Бу эбийиэктэр үлэҕэ киириилэрэ Саха Сиригэр эрэ буолбакка, Уһук Илиҥҥэ бүттүүнүгэр  бырамыысыланнай оҥорон таһаарыы, уоту туһаныы кыамтата улаатарын  мэктиэлиир. «Россети» хампаанньаны кытары бүтүн сетевой комплекс сайдыа. Онон Саха Сирэ үчүгэй эбийиэктэри туһанарыгар ылла», — диэн Николай Шульгинов эттэ.
Саха Сирин бырамыысыланнаһа сайдарыгар бу эбийиэктэр, кырдьык, сүдү суолталаахтарын Ил Дархан Айсен Николаев бэлиэтээн эппитэ. 220 кВ кыамталаах  «КС-1» подстанцияҕа «Сила Сибири», оттон 220 кВ кыамталаах «Налдинская» подстанцияҕа «Южная Якутия» ТОР резиденэ «Инаглинскай» ГОК уонна «Сила Сибири» гаас ситимэ холбонуохтара. Эбийиэктэр аныгы күүстээх уонна коммутационнай оборудованиелаахтар.