Майа сэлиэнньэтин баһылыга Алексей Неустроев санаатын маннык үллэһиннэ:
-- Майаҕа чөл олоҕу тутуһууга ылсан үлэлээбиппит хаһыс да сыла буолла. Быйыл кулун тутар 1 күнүттэн Майа сэлиэнньэтэ чөл олохтоох буолбута уонна арыгы атыыламмат диэн быһаарбыппыт. Нэһилиэнньэни кытта сөбүлэһэн сөптөөх быһаарыыны ылыммыппын. Ил Түмэн сокуона тахсыбыта. Чөл олохтонуу өйдөбүлэ олус киэҥ, аҥаардас арыгы атыытын эрэ бопсуу буолбатах. Киһи күн аайы доруобуйатын туһугар кыһаллыахтаах, этин-хаанын эрчийэ сылдьыахтаах. Онон сиэттэрэн нэһилиэнньэҕэ маассабай успуорт тэнийиэхтээх. Дьон-сэргэ элбэхтик сүүрүөхтээх, хаамыахтаах, сибиэһэй салгыҥҥа сылдьыахтаах. Маны олоххо киллэрэр инниттэн Татьяна Жиркова аатынан марафону хаста да тэрийдибит. Манна элбэх киһи кыттар.
Аны туран, энэргиэтик туһунан этэр буоллахха, күн бүгүн ханнык баҕарар бородуукта маҕаһыыннарыгар кэбэҕэстик атыыланаллар. Дойдубут Бэрэсидьиэнэ 18 саастарын туола илик эдэр дьоҥҥо энэргиэтиги атыылыыры боборго диэн уурааҕы ылыммыта. Научнай да өттүнэн бу утахтар киһи доруобуйатыгар улахан охсууну аҕалалларын быһаарбыттара. Майа олохтоохторун туруорсууларынан балар атыыланыыларын күүскэ бопсор сыалтан урбаанньыттарбытын кытта үлэлэһэн саҕалаатыбыт. Кэлэр кэнчээри ыччаппыт сиргэ чиҥник үктэнэн турарын туһугар бары биир санаанан салайтаран итинник утахтары атыылыыры утарсыахтаахпыт. 20 саастарын туолбут эдэр дьоммут ити утахтартан сылтаан доруобуйалара айгыраан балыыһаҕа киирэллэрэ элбээбитэ кистэл буолбатах. Ноордоро, бүөрдэрэ, быардара мөлтүүр. Онон балары атыылыыры тохтоторго урбаанньыттарбытын кытта биир тылы булан, сөптөөх быһаарыныыга кэлиэхпит диэн эрэнэбит.
Хаартыска Алексей Неустроев тиксэриитэ.
-
1
-
0
-
0
-
0
-
0
-
0
