- Быйыл хаар олус элбэх буолла. Ол иhин күн аайы Бүлүү, Үѳhээ Бүлүү уонна Ньурба улуустарынан аҕыстыы-тоҕустуу тиэхиникэ федеральнай суолга үлэлии тахсар, — диир Сергей Валерьевич. —Биллэрин курдук, хаары кэмигэр ыраастаабатахха, суолга сыстан, чиҥээн хаалар, түүн тымныйар, күнүс сылыйар, онон килэччи мууhуран хаалар. Ол иhин күннэтэ суолу ыраастаан истэхпитинэ эрэ сатанар.
Күндээдэ уонна Үѳhээ Бүлүү аннынан мууhунан туорааhыннары кѳрѳбүт-истэбит. Былырыыҥҥыттан уратыта мууhунан туорааhын кэтитэ 20 м буолла. 4 балаhалаах: 2 сүрүн уонна 2 саппаас. Онон 4 балаhаны хаартан ыраастыыбыт.
Үѳhээҥҥи тэрилтэбит "Упрдор "Вилюй" муус устар 15 күнүттэн суолу сабарга бирикээс таhаарда. Суолу кѳрүүгэ-истиигэ суол бэлиэлэрин, сигнальнай столбиктары кѳрүү-истии эмиэ киирэр. Суолунан айанныыр дьоҥҥо суол бэлиэлэрэ барыта үчүгэйдик кѳстүѳхтээх. Суол бэлиэлэрэ саҥа уонна хаара суох буолуохтаахтар, сырдыгы тэйитиилэрэ нормативка эппиэттиэхтээх. Сотору-сотору кэлэн кѳрѳллѳр, анал приборунан бэрэбиэркэлииллэр.
Былырыын саҕалаабыт эбийиэктэрбитигэр Бүлүү к. 572578 км уонна Чыбыыда уонна Бүлүү куорат икки ардыгар 588 608 км-гар, олунньу 25 к. кѳhѳн тиийэммит, вахтовай бѳhүѳлэкпитин сѳргүтэн, үлэбитин кулун тутар 1 күнүгэр саҕалаабыппыт. Барыта 70-ча киhи (бииригэр 40-ча уонна иккиhигэр 30-ча) үлэлии сылдьар.
Бүлүү куоратыгар былырыын 6 км-тан 1 км аспаалын уурбуппут. Быйыл хаалбыт 5 км аспааллыахтаахпыт уонна сырдатыыта, тротуара, бордюра (10-тан тахса км) оҥоhуллуохтаах. 100-тэн тахса уулуссалар холбоhор уонна туораан тахсар сирдэрдээх. Онон бу улахан кээмэйдээх үлэ буолар.
Оттон Чыбыыда уонна Бүлүү куорат икки ардынааҕы учаастак хапытаалынай ѳрѳмүѳнүгэр 10 км-тан быйыл 4 км аспааллыахтаахпыт, 6 км эhиил оҥоруохтаахпыт. Онон биhигини күhүҥҥэ диэри элбэх үлэ күүтэр.
Ньурба улууhугар 46 км усталаах федеральнай трасса учаастага аспаалланна. Марха уонна Күндээдэ икки ардыгар былааннаммыт сүрүн үлэ бүттэ. "Бүлүү" федеральнай суол 798 км-тан Күндээдэ аннынан Бүлүү ѳрүскэ диэри суол ѳрѳмүѳнэ биллэр тѳрүѳтүнэн уталыйда. Билигин бырайыактааhын үлэтэ бара турар, ол эрээри хаhан олоххо киириэхтээҕэ биллибэт.
Кэлиҥҥи сылларга буолуоҕа. Быйыл Чыбыыдаттан Үѳhээ Бүлүүгэ диэри 50 км усталаах суол учаастагын хапытаалынай ѳрѳ мүѳнүн бырайыага оҥоhуллуохтаах. Эhиил аукцион ыытыллан ѳрѳмүѳн оҥоhуллуохтаах. Ол кэнниттэн Үѳhээ Бүлүүттэн Түүкээҥҥэ диэри, онтон Түүкээнтэн Марха ѳрүскэ диэри бырайыактааhын саҕаланыахтаах. Күүтэбит эрэ. Онон федеральнай суолга быйыл Ньурба улууhугар үлэ суох.
Быйыл "Бүлүү" федеральнай суол таhынааҕы нэhилиэктэр уулуссаларын аспааллааhыҥҥа СѲ Тырааныспарга уонна суол хаhаайыстыбатын министиэристибэтин уонна Ньурба улууhун икки ардыгар федеральнай трасса таhынааҕы нэhилиэктэр киин уулуссаларын аспааллааhыҥҥа пилотнай бырайыагы олоххо киллэриигэ сѳбүлэhии түhэрсиллибитэ. Бу кыттыгас бырагырааманан үлэ быйыл эмиэ салҕанар.
Эрдэ Сүлэҕэ, Àнтоновкаҕа уонна Чаппандаҕа киин уулуссалара аспаалламмыта. Быйыл Дьиикимдэ, Ньурбачаан уулуссалара уонна Àнтоновкаҕа Теленков уулусса оҥоhуллуохтаах. Итини таhынан Ньурба к. Вертолетка микрооройуонугар Макар Семенов аатынан 1 км усталаах уулусса үлэтэ быйыл саҕаланара былааннанар. Итини сэргэ Сэбиэскэй уонна Ст. Васильев уулуссалары холбуур Пушкин, Кыайыы 40 сыла, Лермонтов, Христофор Максимов уулуссаларын аспааллыырга үлэ барыахтаах диэн улуус дьаhалтата аукцион докумуоннарын бэлэмнии сылдьар.
-
0
-
0
-
0
-
0
-
0
-
0
